Arsenal laka tlawm Liverpool-in eng nge an mamawh?

Community Shield-a Arsenal ngam lo chungin Liverpool-in season bul an ṭan a, Premier League-a hneh taka champion Jurgen Klopp-a naute khelh danah fan-ten lawmna tur an hmu tam lo. 

Arsenal, Manchester United, Manchester City, Chelsea leh Tottenham Hotspur ten transfer bazar-ah thawm an nei reng a, Liverpool erawh champion team mah ni se an reh tlawk tlawk a ni ber. 

Merseyside club hian Greek club Olympiakos aṭangin Kostas Tsimikas an lalut tawh a, mahse kum 24 mi defender hi regular player tur ni loin Andy Robertson-a thachhang dawltu tur a ni. 

Inrinni zana Community Shield khelh a nih hma zawng kha chuan Liverpool fans an phun lo a, mahse Arsenal lakah an mualpho tak avangin transfer bazar-a sum ren tak Liverpool neitute lam an hawi ṭan. 

Premier League season zawh ruala Liverpool nena an sawizawm chu Thiago Alcântara a ni a, Spanish midfielder hian Bayern Munich-ah contract thar ziah a tum lo a, Jurgen Klopp-a hnuaia khelh a châk nia sawi a ni bawk. 

Mahse, kum 29 mi midfielder manah hian Bayern-in pound maktaduai 27 tal hmuh an inbeisei a, Liverpool lam hian kum khat bak contract nei tawh lo midfielder lei nan a to deuh niah an ngai thung. 

Hetiang boruak karah hian Bayern Munich CEO Karl-Heinz Rummenigge chuan tun kar chhung ngeia thutlukna siam turin Liverpool-a chah a, Thiago chungchanga chian loh reng a duh lo. 

Spanish midfielder hi Bayern treble champion pui thei a ni miau a, Manchester United an lo lang ve bawk a, hriat tel tur erawh Thiago-a'n pan a duh chu Liverpool a ni - Reds hian Bayern lungawina ang zana Spanish playmaker hi an ngam a nih chuan Anfield a pan ang.

Liverpool hian transfer bazar-ah an inruahman sa ang aia tam sum hman an tum lo tih chu Tsimikas an lakluh dan aṭangin a chiang tawh a, a tirah Norwich City defender Jamal Lewis duh mah se a man an chhiar to avangin Tsimikas lam an hawi nghal. 

Reds hian a phu tawka an hriat aia to chuan Thiago hi lei an tum lo ang tih a chiang a, chumi ruala zawhna awm nghal chu Alcantara hi an mamawh tak tak em, tih chu a ni a, awlsam taka chhan chi erawh a ni lo. 

Liverpool-in Premier League nomawi an chawina kawngah an midfield-a inkawp 'regular' Jordan Henderson, Fabinho leh Georginio Wijnaldum an ṭangkai takzet a, player pathum hi Thiago anga player thiam bik tia sawi tur ni lo mah se Klopp-a game mila khel thei an nihna hi an hlutna a ni. 

Klopp-a game-ah player tlan tam a ngai a, a bik takin midfield-a awm player pathum hian a hma lam nawr an puih tluk zetin hnung lam an ven tel a ngai - anni thawhrimna hi 'free' taka Andy Robertson leh  Trent Alexander-Arnold ten tlarhma an puih theihna chhan a ni tih hriat tel a ṭha. 

Arsenal laka Community Shield-a Liverpool chak lohna inkhel enin Henderson an mamawhna sanzia a lang a, he player hi statistics aṭanga teh chuan ropui tak ni lo mah se team phuarkhawmtu leh midfield-a lehlam goal nawr tur tam tak chhu chattu a ni a, hemi hrechiangtu Football Writers' Association chuan Footballer of the Year-ah an thlang hial. 

Chumi awmzia chu an midfield neihsa hmanga Liverpool-in league nomawi an chawi theih thu kan sawi rualin inthlak danglam an mamawh lo, tia sawi tawp theih a ni lo tih a chiang a, Hendo awm loh lai pawha midfield phuar khawm thei tur an mamawh - chutiang mi chu Thiago a ni. 

Spanish playmaker hian Reds midfielder neihsa te angin tharum ngah tawk lo mah se Jurgen Klopp hi Philippe Coutinho mawi taka vul tirtu kha a ni a, Thiago Alcantara hi a hman thiam loh ring suh. 

Season hmasaah hneh taka league nomawi an chawi chungin Liverpool hian an khingpui defence an ṭhiah theih loh changin box pawn aṭanga danglamna thlen thei midfielder an mamawh niin a lang a, chu mamawh chhanna chu Thiago Alcântara a ni. 

Wembley Stadium-a inkhelah Takumi Minamino-a'n Liverpool-a pan hnua a goal hmasa ber a khung a, January-a Reds zawmtu forward hi Anfield-a a hun hmasa lamah inthlahrung deuh mah se Arsenal laka a khelh dan en chuan mikhual zakzum ang maia a awm reng a rinawm ta lo. 

Divock Origi hi Champions League 2018-19 season-a Liverpool an champion nana a thah thawh avangin theihnghilh theih ni lo mah se tlarhmaa Sadio Mane, Roberto Firmino leh Mohamed Salah thachhang dawltu ni tur hian a nem deuh em aw, tih chu zawhna awm a ni. 

Kum 20 mi Rhian Brewster hi player theihna nei sang tak ni mah se Community Shield-a a penalty pet goal loh aṭangin pressure a la zo lo tih a hriat a, champion tum Liverpool tan bench-a awm tura dah ai chuan loan-a chhuahtir a finthlak mai thei. 

A tawi zawnga sawi chuan Minamino tih loh hi chu Liverpool tlarhma pathum mut ti tui lo tham khawpa starting XI um tur an awm lo niin a lang a, Klopp-a'n champion nawn a tum chuan tlarhma lam en hi a sual lo ang. 

Liverpool-in centre back Dejan Lovren chu Zenit Saint Petersburg lamah an kaltir a, Croatian defender thlaktu tur hi an la lalut lo. Robertson leh Arnold ten thachhang dawl tur pawha rintlak Tsimikas leh Neco Williams an nei tawh a, tlarhnung lai erawh a chhah tawk lo. 

Virgil van Dijk leh Joe Gomez hi tlarhnung laia inkawp leh ber tura ngaih an ni a, Joël Matip a la awm bawk. Mahse, centre back dang Ki-Jana Hoever, Sepp van den Berg leh Nathaniel Phillips te hi an nem deuh hretah a ngaih theih. 

Centre back-a player pakhat lek inhliam hi Liverpool tan thil pawi thui tak ni theiin a lang a, Covid-19 vanga season a chep tak thut avangin player inhliamna chance a sang viau bawk. 

Liverpool hian Premier League nomawi humhima, Champions League-ah beisei neih leh an duh a nih bawk chuan bazar an ngai tih a chiang a, hriat tel atana ṭha erawh season hmasa khan nipui transfer bazar-ah pound maktaduai 8.5 chiah seng chungin an champion.