Everton tan Michael Keane a khel zel dawn

Premier League club Everton-in transfer bazar-a thawm  lian tak an neih piahlamah an player neih ṭhat sa chelh kawngah pawh hma an la zel a, centre back Michael Keane chuan kum nga dang khelh chhunzawm turin contract thar a ziak. 

England international hian kum 2017 khan Burnley aṭangin Everton hi a zawm a, league match 94 khelhsak tawhin goal thum a khung. Everton tana June 2025 thleng khel tura contract thar ziaktu chuan, "Kum duhawm takin min la hmuak dawn chauh a ni. 

"Everton-a kum thum hun ka hman tawh kha nuam ka ti takzet a, hmalam hun pawh êng takin ka thlir a ni. Season bul ṭan thuai a, fan-te hlimna thlen theih ka inbeisei a ni," tiin a sawi. 

Keane chuan Everton manager Carlo Ancelotti a fak bawk a, Italian coach hian nikum December khan Toffees enkawl hna hi a thawk ṭan. Kum 27 mi Keane chuan, "Nitin hian manager leh staff dang te aṭangin thil thar ka zir reng a ni. 

"An bula awm a nuam em em a, khel tura min duh danah an chiang em em bawk. Kan manager hi manager awm tawh zinga ṭha ber pawl a ni," tiin Ancelotti a fak hle.