Chelsea an Chak leh ta!

Chak lo tih leh Chelsea kha a inzawm rei hman viau a, a zuitu chu chak zo lo tih bawk a ni ṭhin. Tunah erawh Blues an indinnghet chho ta a, an mikhualna ramah Crystal Palace 3-1 in an hneh.

Thawhṭanni zan Premier League inkhelah Chelsea tan Conor Gallagher-a'n si phurh sutna goal a khung a, hun tawp dawnah an hmahruaina khung belhin, a tawpa Enzo Fernandez khung chu an chak lawmna goal a ni.

Mauricio Pochettino naute hian league match 24 aṭangin point 34 an hmu a, champion leh Champions League khelh phak beiseina tlem tawh mah se, season thara European football khelh hrim hrim beiseina erawh a la bo vek lo.

Gallagher leh Enzo

Chelsea buaina lian tak pakhat chu goal an khung thei lo kha a ni ṭhin, tun hnaiah erawh midfielder pahnih Gallagher leh Fernandez ten an hna an tlin. Palace an tum hmain Pochettino pawhin Conor leh Enzo te chu an innghahna an nih thu a sawi.

Selhurst Park-ah Chelsea hian inkhel an thunun a, mahse Jefferson Lerma chuan box sir lama a ball chan chu insiamrem puiin, hla deuh tak aṭangin goal kilah mawi zetin a tlawh lut, goalkeeper Dorde Petrovic tan dan theih a ni lo.

Second half tirah Blues lamin an sut, Malo Gusto siamsak chu awmna tur hmun dika awm Gallagher-a'n sutin, goal dang erawh an khung belh thei mai bik lo. Poch-a leh a naute point khata an lungawi a ngai dawn niin a lang hman.

Mahse, minute 90+1 a thleng a, inringtawk taka ball thununtu Cole Palmer chuan a laia awm Gallagher tan a siamsak, a lo pet lut chiang lutuk. Palmer bawk hian thui tak ball a tlanpui hnuah Fernandez tan a siamsak zui leh bawk.

Blues an mawi

Hmanah chuan Frank Lampard an nei ṭhin a, khawvela midfielder ṭha leh hriam berte zinga mi a ni. 'Super Fankie' hun a liam tawh a, hun rei tak chhung chu Blues hian midfielder goal khung thei leh hmuhnawm an nei leh lawk lo.

Tun hnaiah Conor leh Enzo te an hmuhnawm, goal khung kawnga an harsatna tam tak pawh an sukiang mek. Mual laiah ball an sem a ni satliah lo a, inkhel an cheimawi tel - English midfielder Gallagher chuan, "Inringtawk turin min hrilh," tiin Poch-a'n a fuihna a sawi.

Argentine midfielder Enzo hi Blues chet ṭhat tawk loh lai pawha mimala khel ṭha ve ngar ngar kha a ni a, tunah chuan rah ṭha a chhuah dawn niin a lang. Goal hmaah a chiai lo, amah vengtu a bum hnuah pawh a duhna lai takah a pet thei tlat.

London club hian player theihna nei sang tak tak an nei, mual laiah Enzo leh Conor te veng turin Moises Caicedo an la nei tel bawk - season chawhnu leh a tawp lam chu team hmuhnawm zinga mi an ni phak dawn niin a lang.

Pochettino a lawm

A naute khelh danah Chelsea manager Mauricio Pochettino a lawm hle a, a bik takin goal hnih khungtu Conor Gallagher chu a hlutna teh thiam rual loh khawpa sang leh hlu a nih thu a sawi chhuak hial.

Pochettino chuan, "Chelsea tan hian a inpe em em a, a theihna zawng zawng a hlan ṭhin. Goal nawr leh a venhim kawngah a thawhhlawk a, midang ṭanpui turin a inpeih reng, ani ang player hi chu neih mai mai theih pawh a ni lo," a ti.

Kum 24 mi Gallagher hi Chelsea academy aṭanga inzir chhuak a ni a, intuaihriam turin tun hmain Charlton Athletic, Swansea City, West Brom leh Crystal Palace-ah te loan hmangin a kal tawh, tunah hian chhuah a duh niin thu a thang mek.

Poch chuan, "Tunah hian kum khat daih contract a la nei mek, a hma hun chungchang pawh kan sawi dun fo. Chelsea hi a hmangaih a, chhuah tumna a neih ka hre lo, he club tana khelh zel hi a duhthusam zawk a ni," tiin a sawi.

Hodgson hma hun

English football bika manager tawnhriat nei ṭha berte zinga mi Roy Hodgson hma hun a chiang lo mek - Crystal Palace hi Brighton lakah an mualpho zo chiah a ni a, Blues lakah bul ṭan ṭha viau mah se a tawpa an chak lohna chu 3-1 a ni.

Hodgson chuan, "Min ṭantute lam pawhin kan harsatna hi min hriatthiamsak ka beisei, player ṭha inkhel thei lo an awm a nih chuan keini team angah hi chuan a harsa tawh ṭhin a ni. Player naupang tak tak an khelh a ngai a, a tawpah tawnhriat tlemna a lang," a ti.

Palace hian hliam vangin Michael Olise leh Eberechi Eze te an chhawr thei lo a, thlasik bazar tawp nia an lakluh Adam Wharton leh Matheus Franca te chuan an club thar tana an match hmasa ber an khel, khel chhe hran lo mah se an duh result an hmu lo.

Second half ṭan aṭanga second 80 leka goal an chhuah khan an inring hman lo emawni tih mai tur a ni a, hun tawp dawna goal hnih an chhuah pawh Chelsea lamin an nawr nat chu thuhran ni se, a tawp thlengin rilru an pe tawk lo deuh niin a lang.