Liverpool legend enkawl tur zingah Eriksson

Tun hnaia cancer a neih thu puangtu, Liverpool fan ni bawk, England manager hlui Sven-Goran Eriksson chungah Liverpool thuneituten duhsakna an lantir a, March thlaa Liverpool legend leh Ajax legend ten charity match an khelh hun turah Reds management team-ah a tel dawn.

Kum 75 mi Eriksson hian January thla khan cancer natna a neih thu a sawi a, a natna hi a serious tawh avangin kum khat aia tam hun a neih tawh loh thu a sawi tel - a sawi tam tak zingah Liverpool fan a nih thu sawiin, "Liverpool enkawl hi ka châk reng ṭhin," a ti.

Reds fan-ten Swede coach hi a thih hmaa a duhthusam a hlawhtlin duhsakin, hma an laksak a, Liverpool legend a enkawl theih dan tur ngaihtuah turin club an ngen hial - tunah chuan match khat atana Liverpool legend enkawltu zingah a tel dawn a ni.

Liverpool chuan thuchhuah siamin, "LFC player ropui tak tak, Ian Rush, John Barnes leh John Aldridge te telna management team-ah a tel dawn a ni," an ti a, match hi March 23-ah khelh tur a ni ang.

Merseyside club chuan, "Liverpool club chhungkua leh LFC Foundation chuan kan club ṭantu Sven leh a chhungkuate Anfield-a kan lo lawm hun tur hi nghakhlel takin kan thlir a, midangte ṭanpuina tur match-a khelmual sira a lo awm tur hi hmuh kan châk a ni," an ti.

Liverpool manager Jurgen Klopp pawhin Eriksson-a chungchang hi lo sawi tawhin, "Liverpool fan a nih thu leh he club a ngainat thu ka vawi khat hriatna a ni. Legend team enkawl chungchang an sawi pawh ka hria a, mahse, ka thu a ni lo.

"Ka sawi theih chu a duh phawt chuan Liverpool-ah lo kal se, ni khat na na na chu ka office luahin ka hna hi a thawk thei ang. Khelmual team kaihhruai erawh a tan a harsa tawh mai thei a, chutihrual chuan he club-a thil thleng tam tak te lo hrilh a châkawm a, he hmunah hian hun hlimawm tak a hman theih ka beisei a ni," a ti.

Eriksson hian club tam tak a enkawl zingah Benfica, AS Roma, Fiorentina, Sampdoria, Lazio, Manchester City leh Leicester City chu a enkawl langsar an ni a, Lazio hi a hming chherna ber niin Serie A, Coppa Italia (2), Supercoppa Italiana (2), UEFA Cup Winners' Cup (1) leh UEFA Super Cup (1) ah te a champion pui tawh a, Benfica hi league-ah vawi thum ngawt nomawi chawipuiin, Roma leh Sampdoria te hi Coppa Italia-ah vawi khat ve ve a champion pui bawk - a hming chher ṭanna tak erawh UEFA Cup-a Swedish club IFK Göteborg a champion pui kha a ni.

International football-ah England, Mexico, Ivory Coast leh Philippines a lo enkawl tawh a, English mi ni lo zinga England enkawl hmasa ber niin, World Cup 2002 leh 2006-ah quarterfinal a hruai thleng a, Euro 2004-ah khan quarterfinal a hruai thleng bawk.