UCL khel turin Mbappe a inpeih

Paris Saint Germain chuan Champions League khel tura an inbuatsaih lai thlalak an rawn pho lang a, an forward ṭha mi Kylian Mabppe chu chiang takin a lang - France captain hian zanin dar 1:30-ah Real Sociedad a hmachhawn thei dawn tihna a ni.

Kum 25 mi Mbappe hian hliam tenau a nei a, kartawpa Ligue 1 an khelh ṭum pawhin a inlan lo. PSG coach Luis Enrique chuan an player ṭha hi dam chiang lo chunga chhawr a duh lo, hahchawlhna hun a siamsak bawk.

Season kal lai inelna hrang hrangah Mbappe hian match 29 aṭangin goal 30 a khung tawh a, heng zinga goal thum hi Champions League huangah a ni. Zaninah a inlan a nih chuan La Liga club tan ven uluk bik ngai tur a ni dawn.

Mbappe bakah Lionel Messi leh Neymar te meuh an kawl lai pawhin PSG hian UCL nomawi an chawi thei lo a ni a, club thuneitu lamin an duh ber lak hi thil awlsam tak chu a ni lo - Mbappe ho hian thei tak ang maw!

Kartawpa Lille an hneh ṭumin Enrique chuan, "Tun ṭuma Ligue 1 kan khelh hi final ni ta se la chuan Kylian hi a inkhel ang, mahse chutiang a nih loh avangin risk kan la duh lo. Nilaini zanah chuan 100%-in a dam ang," a ti.

Mbappe bakah hian Achraf Hakimi, Vitinha, Bradley Barcola leh Warren Zaire-Emery te chu kartawpah khan hahchawlhtir vek an ni a, coach Enrique-a'n UCL a ngai thutak hle tih a chiang, thapui an thawh ngei dawn.

An inkhelhna tur hmun hi Paris khawpui a ni a, a hmun leh player neih dan chhut chuan PSG hi rinkai zawk an ni. Chutihrualin, La Liga table laihawl luahtu Real Sociedad hi awlsam taka nuai liam ngawt theih chi chu an ni bik lo ang.

Real Sociedad lamah winger ṭha Mikel Oyarzaba chu tun hnaiah tihrawl hliam vangin a inkhel thei lo, zanin atan pawh a dinhmun a chiang lo. La Liga match 24 aṭanga goal 22 chhuahtu team tan PSG lama goal venhim tum hmasak a finthlak ang.