Nursery aiin Champhai an ṭha hret

MSL9 inkhel hmasa berah Champhai Basektball Club-in Nursery Sporting Club chu 102-96 in an hneh. Team pahnih an inhnehtawk a, a tawpah Champhaiin MSL-a tawnhriat an neih tawhna an ṭangkaipui tiin a sawi theih.

Champhai tan an foreinger Tevis Robinson (35 pts) leh Lalropuia (29) te an pawimawh a; Malsawmzela (12 pts) leh Eddie Zothanpuia (14) te an ṭangkai viau bawk.

Nursery hian bul an ṭan ṭha a, first quarter-ah pawh 25-24 in an chungnung. Mahse, an foreigner ṭha zet Dequandre Dentmond-a'n thlawptu an nei tawk lo. Dentmond hian 54 points zet a nei a, a hnaih bertu K. Liandinga'n 19 points rawn nei ve bawkin Champhai nen hian an inum tawk hle.

Team pahnih an insan chhawk chho zak zak a, fourth quater-ah pawh Nursery hian rawn nihrual leh mah se a tawpah Champhai an dingchang.

Champhai hian February 15, Ningani zan dar 8:00-ah Chanmari Vikings an hmachhawn ang. Nursery BC-in Ferbuary 14, Nilaini tlai dar 5:30-ah an veng ṭhenawm Bungkawn LB an hmachhawn dawn - derby match a nih miau avangin boruak a ṭang ang.