Celtic-in Champions League khelh an tum

Scottish Premiership champion Celtic chuan season tharah Champions League khelh ngei an tum tih pholangin first qualifying round-ah hnehna an chang nghal a, KR Reykjavik chu 6-0 in an sawp. 

Celtic tan hian Mohamed Elyounoussi chuan goal hnih a khung a, Arnor Adalsteinsson (own goal), Christopher Jullien, Greg Taylor leh Odsonne Edouard-ten goal khat ṭheuh an khung bawk. Scottish club hian hnehna an chan avangin second qualifying round an lut a, Djurgardens leh Ferencvaros inkhela chak zawk an hmachhawn leh ang. 

Celtic Park-a inkhelah Scottish club-in goal khung turin hun an mamawh rei lo, Elyounoussi chuan minute rukna lekah goal hmahruai a rawn khung a, Celtic an hawikir tawh lo. 

Neil Lennon-a nau ten goal khung pui mamawh lo mah se Icelandic defender Adalsteinsson chuan minute 17-naah an lamah a ti lut a, minute 20 a tlin hmain 2-0 in Celtic-in hma an hruai hman. 

Celtic tan hian Julien, Taylor leh Edouard ten goal khat ṭheuh an khung zui a, goal hmahruai khungtu Elyounoussi chun hun pek belhah goal khatin hnu a rawn khar leh zui. 

Scottish Premiership khelh ṭan a ni tawh a, Celtic hi an player Boli Bolingo­li-a'n Covid-19 dan a bawhchhiat avangin an league match hnih chu khelh hun sawn sak an ni a, team boruak chhiat lai taka an chak hi an lawm khawp ang. 

Celtic hian season thara Champions League khel turin hmabak an la nei ngah hle - second qualifying round an paltlang leh phawt a ngai ang a, chumi zawhah third qualifying round an khel leh ang. 

Third round hi paltlang leh ta pawh ni se playoff round an hmachhawn a la ngai dawn cheu a, hei hi a harsa lai ber tur a ni ang - playoff-ah hian Ajax leh Red Bull Salzburg chu awmsa an ni. 

Champions League kalkawng

*    Champions League group stage-ah team 26 chu league kaltlangin an tling chiang tawh a, qualifier kaltlanga tling team parukin an zawm ve leh ang. 

*    Preliminary round-ah team pali an awm a, knockout match hmanga an inel hnuah final-a chak team chu first round khel turin an tling. 

*    First round-ah hian team 33 an awm sa a, preliminary round-a pakhatnain zawm vein team 34 an ni. 

*    Second round-ah hian team pathum an awm sa a, first round paltlang team 17-in zawm ve lehin team 20 an ni. 

*    Third round-ah team pahnih chu a tling sa an ni a, second round-a chak team 10-in belhin an vaiin team 12 an ni. 

*    Playoff round-ah hian team pahnih an tling sa a, third round-a chak team parukin an belh ve leh ang. 

*    Playoff round-a chak te chu Champions League group stage khel turin an tling. 

*    UEFA club coefficients ranking chu Champions League qualifier khel tur teh nan hian hman a ni.

Qualifier paltlang lote tan

*    Playoff round-a tlawm te chu Europa League group stage khel turin tih an ni. 

*    Third round-a tlawm te chuan Europa League playoff round an khel ang. 

*    Second round-a tlawm te chuan  Europa League third qualifying round an khel dawn. 

*    Preliminary round leh first round-a tlawm te chuan Europa League second qualifying round aṭangin an khel ve leh ang.