Tuchel-a'n Bayern buaina a chingfel thei ang em?

Bayern Munich-in Bundesliga an thunun thei lo a, kartawp khan an elpui Bayer Leverkusen lakah 3-0 in an tlawm. Bundesliga nomawi la chawi loh vanga 'Neverkusen' ti hial an koh fiamin league nomawi an beisei a, nomawi chawi ngei ngei tura ngaih Bayern erawh 'arte lu kawn' thei dinhmunah an ding.

Thomas Tuchel-a'n Bayern buaina chinfel a tum dawn a, a chinfel ran loh chuan ban theih dinhmunah a ding. Zanin dar 1:30 hian Bayern hian UCL last 16-ah Lazio an hmachhawn dawn a, European champion nih tum vang chauh ni loin, tuna an buaina su kiang turin Stadio Olimpico-a hnehna chan hi a pawimawh hle.

Beisei pha lo Tuchel

Chelsea-in Thomas Tuchel an ban khan, mak tih a hlawh hle. PSG manager hlui hian London club hi Champions League nomawi a chawipui miau avangin fak a hlawh a, Bayern hruaitute pawhin an awt takzet.

Season liam ta khan Bayern-in nomawi lian pathum an la beisei reng laiin Julian Nagelsmann an ban a, Tuchel an la lut. Bavarians player-te pawhin mak an ti a, thulukna siamtu chu CEO Oliver Kahn a ni.

Mahse, Tuchel hnuaiah hun rei lote chhungin UCL leh German Cup beiseina a thamral a, Bundesliga-ah pawh match tawp bera Borrusia Dortmund chetsual zarah an champion. Bayern-in bantu Kahn an ban a, Tuchel an la ring zui.

Kuminah pawh Bayern-in Tuchel-a hnuaiah besei an la pha chuang lo a, DFL Supercup-a an chak loh hnuin German Cup-ah pawh an tla tawh. Bundesliga-ah ni se, Bayern-in point nga zetin Bayer Leverkusen an pha tawh lo.

Buaina chu

Bayern enkawl turin Tuchel a ṭha tawk lo a tih theih a, chutihrualin inhliam an ngah ve bawk. Tun ṭumah pawh hian Serge Gnabry, Kingsley Coman, Konrad Laimer leh Bouna Sarr te hliam vangin an dinhmun a chiang lo. Real Madrid nena sawizawm Alphonso Davies phei chu hliam vangin a khel dawn lo tih a chiang tawh.

Hliam vangin Bayern hian buaina an nei ngei a, Tuchel hian buaina a belhchhah ve bawk. Leverkusen an hmachhawn ṭum khan German football-a tawnhriat la nei tlem Eric Dier chu Matthijs de Ligt te awm reng laiin bul a ṭantir a, Joshua Kimmich te an dam tawh chungin kum 19 mi Aleksandar Pavlovic a luhtir.

Inkhelh banah Kimmich chuan, "Leverkusen hmachhawn thei turin training ground-ah theihtawp ka chhuah a, a tawpa thutlukna siamtu chu Coach a ni," tiin a lungawi loh thu a sawi.

Thawhṭanni Bayern training-naah pawh Manuel Neuer leh Noussair Mazraoui te chu team zingah an training lo a, Leroy Sane pawhin minute 15 hnu lekah training ground a chhuahsan. Team chhung buaina lam aiin chawlh hahdamna lam a ni thei bawk.

A êng zawngin

Bayern hian Bundesliga-ah beisei pha lo mah se Champions League-ah erawh an che ṭha a, group stage-ah vawi nga chakin vawi khat chiah an inhnehtawk. Group hmahruaitu an ni a, Lazio lakah pawh rinkai an ni.

Bavarians hian UCL knockout stage-ah sulhnu ṭha an nei bawk a, season 11 chhungin last 16-ah vawi khat chiah chak loh an nei. 2018-19 season khan Liverpool hneh loin an tla a, a bakah chuan quarterfinal an lut vek.

German champion hian Italian club lakah pawh record an nei ṭha a, Italian club an hmachhawn hnuhnung pangaah an chak vek. Lazio pawh hi an hmachhawn hnuhnung pahnihah an hneh ve ve.

Bayern hian khualmualah result an nei ṭha a, match hnuhnung pariatah vawi sarih an chak. April 2023 khan quarterfnal-ah Man City chu Eithad Stadium-ah an hneh lo. An player lakluh thar Harry Kane hi Leverkusen hmaah reh mah se UCL-ah erawh group stage-ah goal li khungin assist vawi thum a nei bawk.

Lazio hi...

Bayern-in duhthu an sam lo a, beisei san vang a ni zawk. Lazio erawh Serie A-ah pariatnaah an awm mek a, match 23 aṭangin point 37 chiah an la hmu. UCL group stage-ah pawh vawi hnih ngawt an chak lo a, chutihrualin player ṭha an kawl tih hriat a ṭha.

Lazio hian tlarhmaah Ciro Immobile, Felipe Anderson leh Pedro te an nei a, German football hrechiangtu Daichi Kamada pawh an kawl. Arsenal leh Marseille-a tawnhriat nei ṭha Mattéo Guendouzi pawh a awm a, Italian club hian Bayern mangchhia thlen an tum dawn a ni.

Inlan tura beisei

Lazio: Provedel; Marusic, Romagnoli, Mario Gila, Hysaj; Guendouzi, Vecino, Luis Alberto; Isaksen, Immobile, Felipe Anderson

Khel lo tur: Renzetti (hrem)

Chiang lo : Patric (dar), Zaccagni (ke zungpui)

Bayern: Neuer; Mazraoui, Upamecano, Kim, Guerreiro; Kimmich, Goretzka; Sane, Muller, Musiala; Kane

Khel lo tur: Coman (malpui), Gnabry (ṭhal), Laimer (chawn), Peretz (khup), Sarr (khup)

Chiang lo: Davies (ti hrawl), Zaragoza (damlo)

UCL Last 16 : Copenhagen vs Man City; RB Leipzig vs Real Madrid, PSG vs Real Sociedad; Lazio vs Bayern; PSV vs Borussia Dortmund; Inter vs Atletico Madrid; Porto vs Arsenal; Napoli vs Barcelona