Silly Point : Cho loh lanu val

ICC Under 19 World Cup lamah Indian rawlthar hoten, nikum kumtawp lama an u te chezia an la emaw tih mai turin, hneh loh nei miah loin final an lut. Mahse, final-ah erawh Australia hmaah dawl zawrin an zawr lawi si.

Tihian nikum aṭangin Australia hian ICC tournament paliah India mipui veltu an ni tluan chhuak ta parh. Ṭum li zinga ṭum thum te hi final a ni a; ICC Test Championship, ICC Mens World Cup leh ICC Under 19 World Cup final-ah te India an tlawm vek. India hmeichhe team-in women's T20 World Cup semifinal-ah Australia nulate an hneh lo bawk.

BCCI kut a hmui lo

Roger Binny-a President-na hnuai BCCI mah ni se, a tak rama thuneitu ber chu BJP lal fapa Jay Shah a ni a. Jay Shah kaihruai BCCI hian trophy lamah hian malsawmna a dawng lo niin a lang.

Nikuma India-in World Cup Cricket a thlen ṭum khan champion duhin ICC meuh pawh pawh an zah zo lo. India chaktir an tum luatah pitch thlengin thuneihtu chan an tum a, an chet dan a mawi lo lam hret. Khatiang avangte khan BCCI lam hnarkaitute hi an hmuingil vak dawn lo te pawh a ni mahna le!

Zo tlangvalte kan tlawm

Mangoldai, Assam lamah ni nga awh tur Ranji Trophy semifinal-ah Meghalaya leh Mizoram te an inkhel a, ni hnihna session thumnaah an duhtawk der mai. Mizoram hian bat hmasain 144 runs chauh an siam a, Meghalaya chhanletna pawh 145 chauh a ni.

Mizoramin second innings-ah 153 runs an siam leh a, an la insiamṭha chuang lo. Meghalaya erawh an insiamṭha ta a, 156 runs siamin wicket li chauh an hloh a, wicket rukin an chak. He inkhel runs tam lemlohna tak hi, engmaw hmuhnawm leh ngaihnawm phian lawi si.

Pitch

1st class cricket khelhna atan chuan pitch chuanawm lem lo takah Ranji Trophy semifinal khelh a nih hi, CAM lam hotuten BCCI beng a ti thleng thei turah ngai ila. A ni khat ni aṭangin spinner-ten ball an vawm sawt kawi nghal ziak ziak mai.

India season chawhnu lama spinning pitch a lo ni deuh hi chu hriathhiamna chin a awm nachungin, ball sawt a muang a, a sawt a rualkhai lo, sawt sang thut leh hniam thut awm ṭhin hi cricket-ah chuan an ngaih pawimawh leh duh loh ber a ni.

Mangoldai-ah khan Meghalaya leh Mizoram batsman-te kha, cricket pitch-a inkhel tura lut ai mahin, bomb kamna minefield-ah, thuam famkim nen, 'suicide' tura lut te pawh an ang zawk mah awm e.

Chutirual chuan

A hun pawimawh berah kan Mizo tlangvalte an irhfiak kan ti lo thei lo. Mizoramin league lama Meghalaya hi sawp mah se hun pawimawhah an che ṭha tlat. Meghalaya hian professional players la miah loin, an tawnhriat leh cricket lama hnu hma an lo ngah zawkna a hun taka an hmang thiam ti ta mai ila a fiah ber awm e.

Team Mizoram tan erawh a uiawm dan a sang bik a, chutirual chuan he inkhel hian hun lo la kal zel turah, players tinte thil tamtak a zirtir dawn tih ka chiang. Mizoram cricket tan hnualna tur a awm lo a, hma a sawn zel hi kan beisei tlat a ni.