Serie A-ah team 20 an awm zel dawn
Italian football-a club inelna sang ber Serie A club inhmuhkhawm chuan an kal dan ngaia kal ṭha an ti a, Italian top flight league-a team awm mek 20 tihhniam tumna awm chu an hnawl.
Serie A-a team 20 inel hi 18-a tihniam turin rawtna a awm a, mahse, vote thlak a nih hnuah club tam zawkin club 20 inel chhunzawm zel tura an duh avangin a dan pangngaiin Italian football a kal dawn.
Italian top flight league-a club 16 zet chuan team 20-in inelna an hmachhawn zel hi duhin vote an thlak a, hetihlai hian club pali chuan team 18-a tihhniam an duh thung.
A ngai zelin
Serie A-ah hian 2004-05 season aṭang khan club 20-in inelna an hmachhawn a, club tel an tam hian match khelh tur a tipung - hei hi a bik takin European football-a inlan ṭhin club tan chuan a hautak a, players inhliam ngah a awl.
Heng avang hian hun engemaw chen chu Serie A-a team 18 chauh awm tawh tura ruahmanna hi a awm tawh a, mahse, vote thlak a nih meuh chuan team 18 lekina ram league sang ber khelh chu duh lotu an lo tam zawk.
Serie A-a team 18 chiah inel duhtu club hi tlem mah se, an hrawl hle thung a, Juventus, Inter Milan, AC Milan leh AS Roma an ni - European football an ngaihtuah tel tih a chiang a, heng club-te hian an match khelh zat a tlem theih nan league club tihtlem an thlawp.
Thuneihna
Serie A hian thuneihna sang zawk neih duhin hmalak an tum bawk a, English football-a Premier League-in Football Association hnuai ngawr ngawra kal loa inrelbawlna hranpa ang an neih chu neih ve tumin hma an la dawn.
Italian top flight league hian he ruahmanna hi March thlaa neih tur Italian football federation (FIGC) general assembly-ah an pharh dawn a, Serie A president Lorenzo Casini chuan, "Sum leh pai chungchang lo dah ṭha ta ila, thutlukna siam kawngah thuneihna pumhlum pek kan ni lo a ni," a ti a, thlak danglam a duh.
European football-a league ngaihven hlawh pawl Serie A hi khelh mek niin, Inter Milan chu table chung berah an awm a, an hnuai chiaha awm Juventus aia match khata khel tlem chungin point sarihin an sang zawk - zaninah league match khat khelh tur a awm dawn a, zan dar 11:30 hian Bologna chuan Fiorentina an mikhual ang.