Messi kianga khel tur Redondo

Real Madrid legend Fernando Redondo-a fapa Federico Redondo chuan Lionel Messi khelhna Inter Miami a zawm dawn a, football journalist lar Fabrizio Romano tarlan dan chuan euro maktaduai riatin US club hi a zawm dawn.

Kum 21 mi defensive midfielder hian Argentinos Juniors tan a khel mek a, senior level-ah ram tan la inlan lo mah se Argentina Under-20 leh U23 tan a lo khel tawh - Messi kianga khelh hi a châk khawp ang.

Argentinos Juniors hian Redondo hi hralh mah se, Miami club nen an inrem dan chuan, US club hian Argentine midfielder hi an hralh chhuak leh a nih chuan Argentinos hian a hralhna aṭanga 15% chu an la chang ve leh dawn bawk a ni.

Redondo hi Bayern Munich, Wolfsburg leh River Plate te pawhin lakluh tumin an hel vek nia sawi a ni a, mahse, Major League Soccer lama kal a thlang zawk - Messi kianga khelh ve phawt a duh niin a lang.

Inter Miami hian player langsar tak tak an kawl nual a, Messi bakah hian Barcelona tana Messi-a khelhpui ṭhin Sergio Busquets, Jordi Alba leh Luis Suarez te pawh an nei a, heti chung hian pre-season-ah beisei an phak lo.

Hei vang hian David Beckham-a team hian intuaithar hna an thawk zui a, tunlaia player ngaihven hlawh pawl Redondo an la lut thei hi an lawm khawp ang.

European top five league tih loha khawvela football league ngaihven hlawh pawl MLS hian season chawlh an hmang mek a, February 22-ah season thar bul ṭan tur niin, match hmasa berah Inter Miami hi an inlan dawn a, zing dar 6:30-ah Real Salt Lake an mikhual dawn a ni.