Kan dinhmun hriatthiam a harsa - Allegri

Juventus coach Massimiliano Allegri chuan tunlaia an club dinhmun chu hriatthiam harsa a tih thu a sawi a, an tan Inter Milan um phak chu thil theih loh ni lo mah se a harsa dawn tih a sawi bawk.

Thawhṭanni zan Serie A inkhelah Old Lady hian Udinese chu 1-0 in an ngam lo, match 24 aṭanga point 53 chauh an neih avangin Inter an phak lohna chu point sarih a ni a, an chunga awm Inter hian match khatin an la khel tlem zui.

Bianconeri coach Allegri chuan, "Kan match hmasa lama Empoli kan tum ṭumin minute 18-na lekah kan player hnawhchhuah a ni a, chutiang chung chuan point khat an hlawh chhuak thei tho.

"Tunah Udinese hian kan goal zawnah vawi khat chiah an pet a, mahse a lut tlat si. Keini lamin chawlhlawk hma pawhin goal khung theihna remchang vawi li kan insiam thei thung a, a pawimawh ber goal erawh kan khung lo.

"Siamṭhat ngai lai kan nei tam a, chutihrualin kan phu ang tawk result kan nei lo ṭhin hi a pawi ka ti. Kan elpui Inter Milan chu season hmasa maia Champions League final khel phak an ni, anni nen chuan huang khatah kan awm rih lo," a ti.