La Liga-a chak lo rei ber Almería!

Thawhṭanni zan La Liga inkhelah Almeria chu 0-0 in Athletic Bilbao an inhnehtawkpui a, La Liga season khata chak nei lo rei ber record an siam - tun season-ah league match 24 khel tawhin chak an la nei miah lo!

Almeria hian La Liga hrim hrima chak lo zawn rei ber Levante record an nih rual bawk a, season hmasa chawhnu lama an match-te nen match 27 zet chu a zawnin an chak zo tawh lo a ni.

Hetihrual hian Almeria tan Thawhṭanni zan inkhela an result hi result ṭha a ni - winger Largie Ramazani chu hnawhchhuah a nih avangin minute 37 zet chu player kim loin an khel a, heti chung hian tun hnaia che ṭha tak Athletic Bilbao chu an chelh thei.

Almeria hian tun season-ah point sarih an hlawh chhuak ve tawh a, hei hi draw result aṭang veka an hlawhchhuah niin, La Liga table mawngphah an luah mek a, goal 22 chauh la khungin, an lamah goal 51 a lut tawh thung!

European top five league-a season khar chhe ber record neitu chu Derby County an ni a, 2007-08 Premier League season-ah khan Derby hian point 11 nei chungin season an khar a, match 24 aṭanga point sarih neitu Almeria hian an la nih rual lo ang tih a sawi theih tawh loh.

Almeria hi an vanduai ve hrim hrim tiin a sawi theih a, La Liga team ṭha ber ber lakah pawh an khelh ṭhat ṭhin viau rualin a tawpah a vanduai zawk an ni zel.

Atletico Madrid khelmuala an len ṭumin inkhel thunun mah se, 2-1 in an tlawm a, Barcelona lakah draw an hlawh chhuak dawn emaw tih hnu, minute 83-naah Sergi Roberto goal hmangin an tlawm a, Girona chu an chet ṭhat vanglai takin 0-0 in an chelh a, Real Madrid khelmualah half time chhungin 2-0 in hma an hruai a, mahse, video assistant referee puihna hmanga Real-in goal hnih an khung bakah, hun pek belh minute kuanaah chakna goal an khung.

Almeria-in Bilbao an chelh hi lawm ber tura chhal ngam chu Atletico Madrid an ni. Diego Simeone-a naute hian an league match hnuhnung berah Pathianni zan khan Sevilla chu 1-0 in an ngam lo a, league table-ah palina an ni.

Bilbao hian Almeria khelmualah hnehna chang ngat se, an point hmuh zat a inang dawn a, season thara Champions League khelh phak pawh thil harsa a ni chho dawn. Mahse, Barcelona boss hlui Ernesto Valverde enkawl Bilbao an chak zo lo a, point hniha Atletico thlauin, table-ah pangana an nih chhunzawm.