Punjab-in Blasters an barakhaih

I League champion Punjab FC chuan khualmualah 3-1 in Kerala Blasters an hneh a, tun season ISL-a match thum an chakna chiah a ni - champion tum Blasters tan tun season-a an muala an tlawm vawi khatna a ni thung a, chak ngat se table-a pahnihna ni thei team hi pathumnaah an awm chhunzawm.

Mahni muala inkhel Blasters an inringtawk a, Punjab hi a nawr pawh an nawr na hle. Rahul KP chuan chance duhawm zet hlah mah se, Milos Drincic chuan minute 39-naah goal hmahruai a khung ta tho a, South Indian club hi chak lo tura dah chi an ni lo.

Mahse, football a ni miau a, Blasters hlim chhung a rei lo. Goal an chhuah aṭanga minute thumna lekah Wilmar Jordán Gil chuan si phurh sutna goal a khung a, 1-1 in chawlhlawk an hmang.

Blasters-in beiseina thar nen second half ṭan mah se, goal an khung ve leh tawh lo. Minute 61-naah Colombian striker Jordan bawk inlar lehin, an goal hnihna a khung a, Punjab hian 2-1 in hma an hruai der!

Hun tawp nan minute hnih chiah a awm tawh a, Punjab vanneihna a kaltluang - penalty an hlawh chhuak a, hei hi Slovenian striker Luka Majcen chuan goal-ah chantirin, 3-1 in Punjab club an chak.

I League aṭanga ISL inpetkai Punjab hian kum thar an hmang ṭha hle - kum 2023 khan ISL-ah vawi khat chiah chak an nei a, kum 2024-ah erawh league match hnih khelin vawi hnih an chak ta.

Blasters tan a chetsualnaa a hliam avanga a chawlh reng hnuah Freddy Lallawmawma a inlan ve leh ta a, bench aṭanga luhtir a ni.