Wembanyama hoin Spurs an chak

Nimin zing NBA regular season inkhelah Victor Wembanyama-a'n triple-double neiin, a team San Antonio Spurs chu Toronto Raptors lakah 122-99 in a chakpui.

Kum 20 mi Wembanyama hian point 27 neiin rebound ṭum 14 a la a, heng bakah hian an khingpuite basket neih tur vawi 10 a dansak bawk. Clint Capela (January 2021) hnu lamah NBA match pakhata block nei hnem ber a ni hial.

Basketball inelna ngaihhlut berah hian Hakeem Olajuwon, Ralph Sampson, Kareem Abdul-Jabbar leh David Robinson te chuan match pakhatah point 25, rebound vawi 10 leh block vawi 10 an lo nei kawp tawh, an huangah hian Wembanyama a awm ve ta chiah.

7ft 4in a sang Wembanyama chuan, "Basketball-ah hian block neih hi a harsa tual tual a, kei ngei pawh hian harsa ka ti ṭhin. Khingpuite dang tur hian engtiangin nge ka tih ang tih ka zirchiang nasa, duh ang thlapin tivek thei rih lo mah ila hun duhawm chu a ni," a ti.

Inkhel dangah Minnesota Timberwolves chuan Los Angeles Clippers 121-100 in an hneh a, season kal laiah vawi 37 an chak tlinna niin Western Conference table-ah hma an hruai mek.

Champion lai Denver Nuggets erawh inhliamin a la tibuai, an khingpui Milwaukee Bucks lakah 112-95 in an chak lo. NBA Most Valuable Player vawi hnih ni tawh Giannis Antetokounmpo chuan Bucks tan point 36 a neih bakah rebound ṭum 18 a la.