Leonard awmna Clippers an tlang

Los Angeles Clippers chuan Dallas Mavericks lakah 4-2 in series an la a, conference semifinal an lut. Inkhel dangah Denver Nuggets chuan Utah Jazz an hneh ve leh tak avangin series-ah 3-3 chiah a ni - Nilaini zing dar 6:00-ah game 7 an khel ang.

Boston Celtics chuan conference semifinal an khel ṭan der tawh, nimin zing khan an khingpui Toronto Raptors chu 112-94 zeta sawpin bul an ṭan fuh hle. Nilaini zingah game 2 an khel chhunzawm ve lehnghal dawn a ni.

Kawhi Leonard chuan Clippers tan tha a thawh hlawk chhunzawm zel. Game 6 inkhel hmuhnawm takah Leonard hian point 33 a neih bakah rebounds vawi 14 a la a, assist vawi sarih a nei bawk - a hna thawh tur a tlin hle.

Clippers tan hian Ivica Zubac (15 points & 11 rebounds) leh Paul George (15 points) te an thawhhlawk bawk a, quarter hmasa berah hniam zawk deuh mah se a hnuhnung lam pathumah chungnung zawk vekin harsatna lian tham an tawk lo.

Game 7 khelh ngai loa an tlang avangin Clippers hian hahchawlhna hun an nei rei hret dawn, conference semifinal-ah chuan Utah Jazz leh Denver Nuggets inkhela chak zawk an hmachhawn leh ang, anni pahnih hian game 7 an khelh a ngai dawn avangin chawlhna hun an nei tlem dawn thung.

Game 6-ah chak lo se la chuan Denver Nuggets tan NBA season kal lai a tawp nghal ang. Mahse Jamal Murray-a point 50 neih hmangin Utah Jazz 119-107 in an hneh let a, game 7-ah a tlang tur zawk an chingfel ang.

Seeded pathumna Nuggets leh parukna Jazz te an inkhel tawk hle, hma an inhruai chhawk zak zak hnuah Murray chuan quarter hnihna bikah point 14 ngawt a nei thei a, inkhel boruak thlak danglamtu a ni. Nilaini zingah pawh Murray hi an hmachhuan tur a ni leh dawn.

Jazz hian series tir lam an hmang ṭha, 3-1 ngawtin hma hruai mah se a tawp lamah an zuih. Donovan Mitchell-a'n point 44 ngawt a nei leh a, tun series khelh laiah point 40 chuang vawi thum a neihna a ni. Amaherawhchu thlawptu a nei ṭha tawk lo, tlang tur chuan a ṭhiante an chet fuh tel a ngai.

Regular season hmang ṭha Boston Celtics an kaltluang chhunzawm, coach Brad Stevens kaihhruai team hian Philadelphia 76ers 4-0 a an paltlang hnuah semifinal an khel zui a, an khingpui Toronto Raptors chu 112-94 a sawpin series-ah 1-0 in hma an hruai lehnghal.

Celtics tan player mala langsar fal an awm lo. Jayson Tatum leh Marcus Smart ten point 21 ve ve an nei a, anni pahnih bakah Kemba Walker (18 points), Jaylen Brown (17) leh Daniel Theis (13) te an chet fuh bawk avangin playoff-ah a zawnin match nga an chak ta.

Toronto Raptors pawh hi Celtics ang bawka khel ṭha tluang lai an ni, a zawnin match riat ngawt an chak thei. Mahse conference semifinal-ah an beisei angin an khel chhuak lo, player paruk ngawtin point 10 chuang nei thei mah se che ṭha fal an awm loh an tuar.