Marseille tan Thauvin a lo kir

Olympique Marseille tan striker Florian Thauvin a inlar leh ta. Kum khat chuang goal a khung loh hnuah Thauvin-a'n goal a nei leh ta a, a ṭhiante khung tur dang pahnih siamsak leh bawkin a team hi Brest lakah 3-2 in hnehna a chanpui.

An player zingah Covid-19 kai an awm avangin Marseille inkhelh hun sawn a ni. Pathianni zan khan 2020-21 Ligue 1 season an ṭan ve chiah, point thum an hmuh bakah hun rei tak chhung ke rek hliam vanga chawl tawh Thauvin rawn kir leh hi an tan chanchin ṭha a tling.

France international hi a ke rek hliam vangin season hmasa khan a buai tawh a, kumin March thla khan a dam fel ve chauh. Hri leng vangin match pangngai an nei thei lo zui a, 2019 May thla hnua a vawi khat nan a khung ve leh ta chiah a ni.

Inkhel dangah AS Monaco chuan defender Benoit Badiashile-a goal hmangin Metz 1-0 in an hneh. Lorient, Nimes leh Nice te pawhin an khingpui ṭheuh an hneh bawk.

Champion lai Paris St Germain chu Champions League final an khelh avangin league match an khelh tur pahnih sawnsak an ni a, season thar an la hmang ve lo. Match hnih an khelh tawh aṭanga point ruk hmutu Nice chu a chung berah an awm.