Ligue 1 ṭan hun sawn a ngai

French Ligue 1 season thar chu Zirtawpni zan aṭang hian khelh a ni dawn a, mahse match hmasa ber khel tur Marseille player zingah Covid-19 kai pali an awm avangin an inkhelh hun hi sawn a ni.

Marseille hi Saint-Etienne mikhual tura tih an ni, a hun an sawn avang hian September ni 16 emaw ni 17-ah emaw khelh a ni ang. Inrinni zan leh Pathianni zanah chuan league hi ruahman anga khelh theih a  nih a rinawm.

Season hmasa Ligue 1 kha hri leng vangin kumin April thla khan an titawp a, hun rei tak an inkharkhip hnuah football an khelh chhunzawm leh thei tawh. Season thar pawh hi hri leng chuan buaina a siam dawn tih a lang nghal. France prime minister Jean Castex chuan, "Hri kai zat leh tuartu an tlem zel," tiin an ram chuan hripui dona kawngah hma an sawn thu a sawi, harsatna hneha hmalam pan turin an inpeih.