Foxes an kal fal zel

Leicester City chuan Premier League lama kir leh turin kawng dik an zawh mek zel. Thawhlehni zan Championship inkhelah Sheffield Wednesday chu 2-0 in an hneh.

Foxes tan Jamie Vardy-a'n a naupan laia a club lakah goal a khung - EPL champion tawh tan hian Abdul Fatawu chuan goal a khung bawk, an goal pahnih hi Dewsbury-Hall siamsak ve ve a ni.

Championship match 32 aṭangin Leicester hian point 78 an hmu tawh, tun hnaiah a zawnin match nga an chak vek - anmahni hnaih bertu Leeds United aiin point 12 ngawtin hma an hruai fal, an chesual viau a nih ngawt loh chuan English football inelna sang an khel leh ngei dawn.

Foxes head coach Enzo Maresca chuan, "Second half tir lam minute 15 chhung vel kha kan khel ṭha tawk lo deuh, a bak kha chu engkim a ṭha vek thung," a ti. Stiker Vardy leh Patson Daka te an khel ṭha dun ṭhin a, duhthlan harsa khawp a nih thu a sawi bawk.

Inkhel dangah Leeds pawhin Swansea City chu 4-0 ngawtin an sawp. Crysencio Summerville, Joel Piroe leh Wilfried Gnonto ten chawlhlawk hmain goal an khung a, second half-ah Gnonto chuan a belh leh bawk a ni.