Premier League transfer Transfer lian tham a thleng tawh - a la ngaihnawm dawn chauh!

Covid-19 vangin Premier League club tam zawkin sum an ren a, chutihrualin season thara chet ṭhat tum club ṭhenkhatin sum an thehchhuah ngam tho avangin kumin transfer a ngaihnawm hle. 

July 27 aṭang khan transfer hun hi hawn a ni a, October 5-ah a tawp dawn chauh. September thla pum player leina hun a la awm a, transfer lian tham thleng thei dinhmunah a la ding reng.

Lionel Messi hian Barcelona a chhuahsan a nih chuan Manchester City a pan a rinawm ber. Argentine forward hi a chhuak a nih chuan man nei loin a chhuak dawn a, he transfer bik hi chu player man aṭanga teh chi a ni dawn lo. A thleng a nih chuan football history-a transfer lian ber a ni ang.

Chutihrualin Barcelona lamin chhuahtir an phal lo, Messi release clause hi euro maktaduai 700 (£624m) a ni daih. Hetiang zatin eng club mahin an lei ngam lo thung ang.

Champion rinkai Liverpool an reh a, anmahni hnaih bertu Manchester City erawhin Nathan Ake leh Ferran Torres an la tawh a, an la lak belh ngei a rinawm. Pathumna Manchester United pawh thawm lian tak nen bul an ṭan a, an zuih ral dawn emaw tih hnuah Donny van de Beek hming a rawn ri - an phur thar hle.

Palina Chelsea hi tun dinhmuna thawm nei lian ber an ni zawk. Frank Lampard-a hote hian nikum nipui transfer khan hrem vangin player an lalut lo a, kuminah erawh Thiago Silva, Timo Werner, Hakim Ziyech leh Ben Chilwell te an la der tawh.

Champions League khel lo tur Arsenal-in FA Cup an chawi hnuah Community Shield an chawi leh tawh a, season liam taa an biak fel tawh William Saliba an chhawr thei tawh dawn. 

Loan hmanga an lak tawh sa Cedric Soares leh Pablo Mari te an la nghet a, fans ti phur thei tur khawp player an lak chu Willian a ni. Brazilian winger Willian hi danglamna thlen thei player a ni a, Arsenal hian defender an la melh bawk.

Chelsea, Real Madrid leh Manchester United enkawl ṭhin Jose Mourinho pawh Tottenham Hotspur a enkawl meuh chuan a mit it zawng tih hniam a ngai. Player pathum a lak tawhte Matt Doherty, Pierre-Emile Hojbjerg leh Joe Hart te hi an ṭhatpui tur a ni a, chutihrualin club lian dangin an chuhpui lo.