Bravo-a'n Man City chhuahsan

Claudio Bravo chuan Manchester City tan contract a hman zawh hnuah Etihad Stadium a chhuahsan, Premier League club hian an keeper hi an beisei anga a khelh ṭhat loh avangin contract thar an zawrh lo.

Kum 2016 khan Barcelona aṭangin Bravo hian pound maktaduai 15.4 in City hi a zawm, season li daih contract a ziak. Pep Guardiola-a'n Barca lama a hman thiam tawh hi chhawr ṭangkai tum viau mah se City-ah a hlawhtling ta lo a ni.

Chile international hi kum 37 mi a ni tawh a, a vanglai a liam tawh - City tan hian inelna hrang hrangah match 61 khelin clean sheet vawi 20 a neihsak hman; an beisei a phak loh avangin Ederson an lalut a, khelhna hmun a chang chhunzawm lo.

Thlahna thu sawiin Man City chuan, "Claudio-a'n season li chhunga club tana a hnathawh leh thil tih zawng zawng avang khan a chungah lawmthu kan sawi, a kal lehzelna turah pawh duhsakna sang ber kan hlan," a ti.

Bravo hian inkhelh chawlhsan a tum thu a la sawi lo, khawi ram lamah nge a inkhelh zui dawn tih erawh sawi lan a la ni lo thung.