Muguruza dinhmun a chiang lo

Garbine Muguruza chu US Open khelh tur atan a dinhmun a chiang lo, Spanish nula dinhmun chian loh chhan hi Covid-19 vang ni loin hliam a neih vang a ni thung - Western and Southern Open aṭang chuan a inhnukdawk chiang tawh.

Tun kar tawp aṭang hian New York khawpuiah Western and Southern Open khelh a ni dawn a, hard court inelna hi US Open inbuatsaihna tur a ni ang. A hmun ngaiah hian August 31 aṭangin Grand Slam hi khelh tur a ni.

Kum 26 mi Muguruza chuan, Ka kerek vei lam hliam a la dam fel lo a, hei vang hian Western and Southern Open chu ka khel thei dawn lo. Tun thla tawpah ka inkhel thei ngei dawn em tih pawh a chiang lo zui a, a hma thei ang bera tennis khelh leh chu ka tum ang," a ti.

French Open leh Wimbledon pawh champion tawh Muguruza hian tun season a hmang ṭha. Janaury thla khan Australian Open final a lut, nomawi chawi chiah lo mah se a khel a hmuhnawm hle - hripui leng vangin hun rei tak a inkhel thei ta lo.

US Open hi a hmuna entu awm loin khelh a ni dawn, mahse tournament khelhna tur hi coronavirus hluarna a nih avangin player inhnukdawk an tam hle. Hmeichhe lamah chuan ranking sang zual 10 zinga paruk chuan an inlan loh tur thu an ti chiang tawh.

American star Serena Williams, 2018 champion Naomi Osaka, Australian Open champion Sofia Kenin leh world number 3 Karolina Pliskova te erawhin inlan ngei an tum thu an ti chiang ve thung.