Man United player tur Van de Beek

Manchester United chu Ajax nen Donny van de Beek chungchangah pound maktaduai 40 velin an inrem.

Transfer hi ziaka tih fel la ni lo mah se harsatna awm turah an ngai lo. United-in September 19-a Crystal Palace an hmachhawn hunah Van de Beek hi tel hman tura ngaih a ni.

United boss Ole Gunnar Solskjaer chuan Netherlands international hi a hman ṭangkai theih turah ngaiin a inkhel lai hi a en fo tawh.

Kum 23 mi Van de Beek hi Real Madrid leh Barcelona te nen pawh sawi zawm a ni a, United vanneihna erawh Ajax chief executive hi an keeper hlui Edwin van der Sar a ni. June thla khan Van der Sar hian Real leh United-in Van de Beek an ngaihven thu a sawi tawh a, pawisa phut zat an neih thu pawh a sawi bawk. 

Dutch midfielder Van de Beek chuan, "Ajax tana ka khel thei hi ka inchhuang a, chona lian zawk hmachhawn erawh ka duh. Chutihrualin Covid-19 vanga club lian zawk ka zawm thei lo a nih pawhin Johan Cryuff Arena-ah hian lawm takin ka khel zel ang," tiin a lo sawi tawh a, tunah chuan a duh ang ngeiin Premier League-a record nei ṭha ber club a zawm dawn niin a lang.

Ajax chuan August 30 khan Union Berlin nen friendly match an khel a, Van de Beek hi squad-ah an dah lo. Dutch club coach Erik ten Hag chuan, "Donny van de Beek hi a hma lam hun atana indawrna a awm avangin a chawl rih a ni," tiin a sawi a, chhuak thei dinhmunah a ding.

Khawtlang media-te chuan Van de Beek hian a ṭhiante bulah Old Trafford a pan tur thu a sawi niin a tarlang a, a tira thuthang satliah chu a ri ring tial tial. August 30 zanah journalist rintlak ber zinga mi Fabrizio Romano-a'n club pahnihin inremna an neih thu a rawn tichiang a, BBC leh news agency lian hoin an rawn nemnghet zui bawk.

Manchester United hian nipui transfer ṭantirh khan Jadon Sancho lak tumin Borussia Dortmund an dawr a, German club phalna zat pound maktaduai 100 vel chu English club-in an ngam lo. United ṭantuten Tlumtea thlira an thlir Sancho lak theih an la beisei fan a, an beiseina thleng dik tur chuan club hotute lamin sum an thehchhuah tam a ṭul thung ang.

Dutch club Ajax erawhin Van de Beek man uchuak takin an chhiar lo a, pound maktaduai 40 vel an phut chu United-in an ngam nghal nia sawi a ni. Khawthlang media-te tarlan danin Van de Beek man hi pound maktaduai 35.7 (€40m) a ni ang a, a chet ṭhat dan a zira an pek belh tur nen pound maktaduai 40 a tling chho thei ang.

Van de Beek hi tun karah Manchester United player a nih hman beisei a ni a, chutihrualin United player tih theih a la ni lo. John Obi Mikel pawhin kum 2006 khan Chelsea a zawm hmain Manchester United jersey a ha hman a, London club tan a khel ta zawk.

Dutch midfielder pawh hi contract a ziah fel hma loh chuan United player a la ni lo a, a zawm ngei erawh a rinawm thung. Netherlands-in September 4, Zirtawpni zan hian Nations League-ah Poland an mikhual dawn a, Van de Beek hian a ti fel hman a nih chuan Manchester United player nichungin a khel thei ang.

Oranje hian August 7, Thawhṭanni zanah Italy an hmachhawn dawn a, Van de Beek-a'n rilru la pengtu dang nei loa inkhel tur chuan contract a ziah fel hma a ṭul dawn. Hei hi Ronald Koeman thlak lailawktu Dwight Lodeweges duhthusam pawh a ni ang.

Netherlands star hlui Rafael van der Vaart chuan Donny van de Beek leh Manchester United chu an inkawp rem thlap a rin thu a sawi.

Kum 23 mi Donny van de Beek hi feet ruka sang niin centre midfielder a ni. Dutch midfielder Van de Beek hi 2018/19 season khan attacking midfielder-ah a khel a, amaherawhchu Frenkie de Jong-a'n Barcelona a pan tak avangin season liam ta khan pawh hnun hret niin no. 6 role a chelh.

Van de Beek hi box to box midfielder tiha sawi theih a ni a, ball pass ṭha tak a nih bakah a hawi zau a, season liam ta khan 82% zet a pass dik. Manchester United-in Paul Pogba leh Bruno Fernandes nei tawh mah se Fred leh Scott McTominay te rinrawla hman tlak an nih loh avang leh Nemanja Matic a upat tawh avangin midfielder ṭha kawppui tur pakhat dang an la mamawhah a ngaih theih.

Van de Beek hi midfielder goal khung thei tak a ni a, season liam ta pathumah goal 10 a khung tling vek. Dutch midfielder hian Ajax tan match 175 a khelhah goal 41 a khungsak a, Eredivisie, KNVB Cup leh Johan Cruyff Shield-ah nomawi a chawipui vek tawh.

Kum 2019-a Ballon d'Or thlan a nih khan 28-na a ni phak a, kum 2014-15 khan Ajax Talent of the Future-ah thlan a nih tawh bawk avangin hmabak a nei êng tih hi a sulhnu aṭangin a hriat theih a ni.