Bayern Munich an chak lo nawn: Harry Kane leh a ṭhiante an nil

Bayern Munich-in 'Bundesliga final' tia chhal ngam inkhel pawimawhah Bayer Leverkusen 3-0 ngawtin an hneh lo a; February 14, Nilaini zan khan Champions League last 16-ah Lazio 1-0 in an hneh lo leh bawk. German champion-in goal zawnah vawi khatmah an pet lo a, Harry Kane a 'nil'.

Stadio Olimpico, Rome-ah Ciro Immobile-a'n penalty aṭangin goal awmchhun a khung a, first leg-ah Lazio-in hnehna an chang. A êng zawnga thlir chuan Bayern tan beisei tur a la awm; UCL-ah away goal rule a awm tawh lo a, Allianz Arena-ah second leg an khel dawn.

Bayern ṭha zawk

Leverkusen an hneh loh ṭumin Thomas Tuchel-a'n tawnhriat nei player ṭhenkhat a chawlhtir a, Lazio an hmachhawn ṭumah erawh Thomas Müller leh Joshua Kimmich ten bul an ṭan nghal. Borussia Dortmund aṭanga Bayern zawmtu Raphael Guerreiro pawh bul ṭantu zingah a tel.

Defence laiah Kim Min-jae leh Dayot Upamecano te an inkawp a, Matthijs de Ligt leh Eric Dier te bench-ah an awm. Tlarhma lamah Harry Kane chu Jamal Musiala leh Leroy Sane ten an thlawp.

Bayern hian hliam vangin Alphonso Davies, Serge Gnabry leh Kingsley Coman te chhawr thei lo mah se Lazio hneh nan an starting eleven hi an la ṭha tawk hle.

A goal thei lo

Bayern hian minute 90 chhungin vawi khatmah goal-ah an pet lo a, chutihrualin goal chance an insiam lo tihna erawh a ni lo. Bavarians hian chance ṭha an nei a, Lazio tlarhnung pawh an ṭhiat mawi - mahse goal hmaah an vannei lo.

Minute sarihna lekah Kane pawhin goal khung theihna remchang a nei a, England captain hian Thomas Muller hnen aṭanga a ball hmuh chu hnai tak aṭangin a pet over.

Lazio pawhin chance an nei ve tho a, Luis Alberto-a'n box pawn aṭangin goal pawnah chiah a pet. Bayern chance neih a ṭha zawk zel a, Musiala freekick hmuh chu Leroy Sane-a'n goal pawnah chiah a pet.

Bayern-in game play mawi an lantir a; Upamecano ball pek chu Sane-a'n kheng zeuhin Leon Goretzka-a'n pe nghalin Muller-a'n kheng let lehin Goretzka-a'n Musiala tan a pe. German rawlthar duhawm Musiala hian a pet over.

Goal khat a tawk

Lazio tan Danish forward Gustav Isaksen a khel ṭha a, kum 22 mi Isaksen hian second half ṭantirhah goalkeeper Manuel Neuer chauh hmachhawn tawh mah se a khung thei lo.

Mahse, Isaksen hian Upamecano lakah penalty a hlawh chhuak a, French defender Upamecano hi hnawhchhuah a ni bawk. Bayern defender hi a fimkhur lo a, ball awm tawh loh hnuah Isaksen a tlawh a, penalty a chawi bakah player 10-in an khelh phah.

Lazio captain Immobile a rawn pen chhuak a, minute 69-naah Manuel Neuer bumin hmahruaina goal a khung. Bayern-in a chhanletna an nei lo a, Italian club hi 1-0 in an chak.

Lazio tan Matteo Guendouzi a khel ṭha a, hmun tinah a awm emaw tih mai tur a ni. Luis Alberto-a'n ball a chanin goal hlauhawmah a chantir ṭhin a, chutihrualin penalty hlawh chhuaktu Isaksen a khel ṭha takzet.

Engtin zel?

Bayern an buai tih phat rual a ni lo. Harry Kane-a'n nomawi duhin Bayern a zawm a, mak tak maiin nomawi chawi lo thei dinhmunah a ding. Champions League-ah Lazio hi lehthal thei pawh ni se club lian zawkin round sang zawkah an lo la hmuak dawn.

Bavarians hian inelna hnuhnung 13-ah vawi 12 ngawt last 16 hi an paltlang a, tun ṭumah pawh first leg chak lo mah se quarterfinal lut tura rin zawk an la ni thei ang.

Chutihrualin Thomas Tuchel-a ban duhtu an pung zel a, PSG leh Chelsea manager hlui hi an result a zirin second leg-ah a awm tawh lo thei bawk. Tuchel thlaktu tura sawi rik zingah Hansi Flick hming pawh a ri tel.

Tuchel hian season liam ta khan Bayern hi Bundesliga-ah champion pui mah se match 43 lekah vawi 10 a chak lo tawh. A thlak tak Julian Nagelsmann kha chuan vawi 10 a chak lohin match 84 a enkawl hman. Bayern hian tun kartawp hian VfL Bochum an hmachhawn dawn a, insiamṭhatna remchang a ni thei ang.