Mbappe awmna PSG an chak

Kylian Mbappe-a'n a dam chiang ta tih lantir nan goal a khung leh nghal a, a club Paris Saint Germain chu Real Sociedad lakah 2-0 in an chakpui - Champions League last 16 bul an ṭan fuh hle.

Spanish club Real Sociedad khelmualah an la intawng ve leh dawn. Luis Enrique naute tan quarterfinal lut turin kawng a inhawng zau, goal an khung belh lo a nih pawhin an neihsa an humhim chuan an tlang dawn.

Paris a mawi

France khawpui Paris khawpui chhunga khelmual hmingthang Parc des Princes-ah Champions League en turin mipui an fuankhawm a, a tir lamah erawh mikhual Real Sociedad an khel ṭha zawk a, an hlauhawm hle bawk.

Andre Silva-a'n PSG tlarhnung a chhaih buai fo, Portuguese forward hian box pawn aṭangin goal ban hrulah a pet chhuak - a lut teuh hle. A ball tauh pawh keeper Gianluigi Donnarumma tan dan phak ni lo mah se goal ban hrulah tho a kal chhuak.

PSG an awm mai mai bik lo - Ousmane Dembele ball pek dawngtu Mbappe chuan Real Sociedad keeper Alex Remiro tan hna hautak zet a siamsak a, mahse a lut bik lo. Mikel Merino pawhin goal bar a rawn hem per pawp - teuh thei ther ther tak a ni.

Second half-ah Dembele-a corner pet an tauh chhuak ṭha tawk lo, a sir lama awm Mbappe lamah a kal hlauh - France captain hian laklawh nei miah loin a lo zuan a, a tlawh lut pawp. A goal neih hnu lawkah hla deuh tak aṭangin bar a per per leh dawp bawk.

PSG bawk an che fuh leh, forward Bradley Barcola-a'n amah vengtu Hamari Traore a bum a, defender dangin an rawn nanchin hma leh keeper rawn chhuah thlen hma siin a pet daih a, keeper Remiro tan dan theih a ni tawh lo.

UCL an nghak

Arab sum hmanga siam len an nih hnuah PSG hian Ligue 1 nomawi ringawt pawh vawi kua an chawi tawh, kum 2011 aṭang khan manager pasarih an ruai tawh a, tun hnai kum li bikah manager pali an nei bawk.

Club thuneitu lamin an duh ber chu Champions League nomawi a ni. Lionel Messi, Neymar leh Mbappe te an kawl khawm lai pawhin an chawi thei lo, tunah chuan vanglai hmangtu Mbappe kutah a innghat thui ta hle.

Kum 25 mi Mbappe hian season duhawm a hmang mek, tun season inelna hrang hrangah match 30 a khelh aṭangin goal 31 a khung tawh - European league lian pangaa khel player zingah a khung tam ber.

Champions League bikah hian match 68 a khelh aṭangin goal 44 a khung tawh bawk, a la khung belh zel bawk ang. Player ṭha leh danglam a ni a, champion pui tham a ni. Ligue 1 chauh ni loin UCL pawh an beisei ngam.

Mbappe hian vanneihna tak a nei, player hrawl pui pui khelhpui rih lo mah se manager ṭha Enrique-a'n a kaihruai. Spanish manager hi Barcelona tana season khata nomawi pathum chawi thei kha a ni a, an manager hmasate nen chuan khaikhin chi a ni lo mai thei.

Sociedad an chuai

Real Sociedad hian season hmasa an hmang ṭha a, an phu ang ngeiin Champions League an khel. European football inelna sang berah hian group match pawh an khel ṭha, goal hnih chauh chhuah chungin Group D hmahruaitu ni chungin an tlang.

Season hmasa finalist Inter Milan chungah an awm thei. Last 16 tir lam pawh an khel ṭha viau, mahse a hmawr an bawk thei tlat lo. PSG lakah hian group stage match ruka an goal chhuah zat (2 goals) an chhuah der, chu pawh minute 12 kar danah lek a ni.

Tun hnai kum 20 chhunga a vawi khat nan UCL knockout stage an khel a ni a, tunlai tak hi an boruak ṭhat vanglai a ni lo bawk nen an tan thil a harsa ve deuh ni pawhin a lang, anmahni khelmuala an la khelh dawn avang erawh chuan beisei an nei sang.

Hliam vangin captain Mikel Oyarzabal an chhawr thei lo - Spanish winger hian tun season UCL-ah goal hnih a khung tawh, second leg an khelh hunah chuan inlan thei tawh tura beisei a ni a, boruak tidanglam thei tur a ni.

European football bikah a zawna match sarih chhung tlawm loa an kaltluanna a tawp rih a, thawhchhuah leh chu an tum ngei dawn. Imanol Alguacil naute hian hloh leh tur chuang awm loa an beih dawn avangin a hmuhnawm ang.