Nursery chungah Bungkawn

Bungkawn LB Asso-ciates chuan Nursery Veng Sporting Club chu 87-79 in an hneh a, tualchhung basketball inelna lian Mizoram Super League season 9 kal laiah match hnih khel tawhin an chak ve ve - bul an ṭan fuh hle.

Nilaini zan R. Dengṭhuama Indoor Stadium, Mualpuia inkhelah Bungkawn LB tan Gregory Lee Heckstall (27 points), Lalruatkima (18), Zorempuia (13) leh Ngurchungnunga Sailo (10) te an khel ṭha rual vek.

Dequandre Duprii Dentmond chuan point 41 tehmeuh a nei a, tun MSL neih laiah match khata point nei hnem ber a ni hial. Dentmond a khel ṭha fal a, point 14 neitu Lalchhuanchhuahna chuan a thlawp ṭha bawk, mahse midang che ṭha an awm lo - an chakpui zo ta lo a ni.

Bungkawn LB Associates hian zanin dar 5:30 hian Zarkawt BCA an tum leh nghal dawn, a chak lo lam Nursery hian zan dar 8:30-ah Chanmari Vikings an hmachhawn zui ve leh nghal bawk ang.

Nilaini zan inkhel dangah Zarkawt BCA chuan Venghlui VR4 chu 109-71 in an hneh, an match hmasa lamah champion lai Khatla TBL an lo hneh tawh bawk, zanin an tum tur Bungkawn LB tan fimkhur a ngai dawn hle.

BCA hian Venghlui lakah awlsam takin hnehna an chang mai bik lo, quarter hmasa berah phei chuan 19-24 in an hniam zawk. Mahse, quarter dang pathumah chuan an chungnung zawk vek thung a ni.

Lalnunpui Renthei (27 points), Lalrina Renthlei (26), Emmanuel Malou (16) leh Zonunsanga (11) ten tha an thawhhlawk lehpek hle a, tualchhung player an neih ṭhat hi an chakna hnar a ni ṭhin.