Santosh Trophy : Mizoram hmabak a harsa dawn em?
77th edition of the National Football Championship for the Santosh Trophy 2023-24 Final Round chu February 21, Nilaini aṭangin Itanagar, Arunachal Pradesh-ah khelh ṭan a ni dawn. Coach Lalsangzuala Hmar leh manager K. Lalenghluna (Maenga) te kaihhruai Mizoram team chuan kum nga hnuah a vawi khat nan final round an lut a, champion turin an ṭha tawk em, tih hi zawhna awm chu a ni.
Group stage aṭanga thlir chuan Mizoram team hi champion turin an ṭha tawk lo tih a hriat theih a, a chhan chu an group-ah pakhatna an ni pha lo. Services an hneh loh avangin pahnihna ni chungin final round an lut a, an group-a team ziaawm deuh Uttarakhand leh Sikkim te chu 1-0 ve ve chauhin an hneh. Mizoram hi final round khelh tur hian thla khat chuang an inpuahchah tawh a, inelna hmachhawn turin an inpeih tawh. Chutihrualin champion turin an ṭha tawk em, tih chu chhan thiam a la har.
Group A lam hi
Final round-ah hian team 12 an inel dawn a, group A nge ṭha zawk group B tih hi zawhna awm nghal chu a ni. Group stage an khelh dan aṭanga thlir chuan ṭha zawk hriatthiam a har a, an intluktawk viauah a ngaih theih. Chutihrualin final round khel tura tling nghal Arunachal Pradesh hi an sulhnu aṭanga thlir kir chuan nem deuh tura ngaih an ni a, mah se mahni muala khel tur an nih avangin an khauh viau thei bawk.
Group A-ah Arunachal Pradesh, Meghalaya, Goa, Assam, Services leh Kerala te an awm. Services hi Mizoram an hneh vang ni loin National Games-a gold medal an lak avangin an ṭha tih chu a chiang a, group match-ah an khingpui an hneh vek.
Meghalaya hi nikum finalist an nih avanga final round lut an ni a, group stage an khel lo. Santosh Trophy vangin Meghalaya football league khelh hun an sawn a, inelna an lak thutak bakah nikum lama an record vangin dah hniam an rem lo.
Group A-ah hian thilmak tak a awm a, group stage-a awm kawp tawh Goa leh Kerala te an awm dun. Football thiam vanga lar ve ve an ni a, Goa hi Gujarat nen an inhnehtawk avangin tla thei dinhmunah an ding. Mahse, group stage thlengtu Goa hian hun pawimawhah Kerala an hneh a, group-a pakhatna ni chungin an tling. Kerala erawh pahnihna ni chungin an tling thung. Goa hi India coach lar Derick Pereira enkawl a ni.
Assam hian group stage an khel ṭha takzet a, Railways te nen group khata an awm chungin an khingpui an hneh vek a, goal 20 khungin goal an chhuah lo. Group khat aṭangin pali tlang tur a ni a; Goa, Assam leh Services te hi group stage-a pakhatna an ni a, Meghalaya hi nikum finalist an ni. Kerala leh Arunachal Pradesh hi team nem deuh tur an ni thei a, mah se Kerala an chhe ngai lo. Tute pawh hi tling thei leh tla thei vek an ni.
Group B ve thung
Group B-ah Karnataka, Maharashtra, Delhi, Manipur, Mizoram leh Railways te an awm a, Karnataka hi champion lai an ni. Chutihrualin champion lai team vanduaina chu ISL leh I League club ten an player ṭha an chhuhsak nual a rinawm a, group match an khel lo bawk nen match fitness an nei lo thei bawk.
Maharashtra hian harsatna nei loin final round an lut a, chutihrualin an group-ah team ṭha an awm lo. Telangana, Lakshadweep, Tripura, Andaman & Nicobar leh Andhra Pradesh te nen awm ho a, team ṭha an awmpui lo. Eng ang chiaha ṭha nge an ni tih erawh Mizoram an hmachhawn hunah a chiang ang.
Delhi erawh tun hnaiah bik chuan dah hniam a thiang lo. Santosh Trophy-a result nei ṭha turin sum an seng hnem a, group harsa ber aṭangin final round an lut. Delhi hi Punjab, West Bengal leh Odisha te nen group khata an awm chungin an group-ah pakhatna an ni a, anmahni vang hian Santosh Trophy-a record nei ṭha lawr lak West Bengal an tel dawn lo.
Manipur hian Maharashtra te ang thoin an khingpuite an hneh vek. NorthEast state-a footballer thawnchhuak hnem ber an ni a, chhiat lai tak tak an nei lo. Group stage-ah Manipur hian goal 21 an khung thei a, National Games-ah final an luh bawk avangin team ṭha zinga mi tur an ni.
Railways hian pahnihna ni chungin final round an lut a, an group-ah Assam chauh an hneh lo a, an hneh lohna zat hi 1-0 chauh a ni. Heta ṭanga lang chiang ta deuh chu team tin an intluk tawk tih hi a ni a, Mizoram tan champion beiseina kawng a inhawn rualin knockout stage a luh loh theih tiin a sawi theih ang.
Santosh Trophy hi National Games khel tur zawnna a ni tel a, Mizoramin final round an khelh phak loh avangin nikuma neih National Games-ah pawh football team an tir thei lo. Uttarakhand-a neih tur National Games-ah Mizoramin team an tir theih nan tun ṭumah hian quarterfinal tal an luh a ngai a ni.