United 2023 - football squad man to ber!
European football-a thuneitu sang ber UEFA hnuaia European Club Finance & Investment Landscape report chuan, kum 2023-a Manchester United squad kha football club squad-a man to ber an nih thu an sawi!
Kum 2023 financial year tawp lama Manchester United player-te man belhkhawm chu pound tluklehdingawn 1.21 a ni a, hei aia player man belh khawma tam zawk club-ah an la awm ngai lo. Kum 2020 khan Real Madrid squad man belhkhawm chu £1.13tld a ni a, he record hi United hian an khum.
Kum 2023 United financial year tawp lama an squad man tisangtu zingah £82mtd man Antony, Harry Maguire (£80mtd), Jadon Sancho (£73mtd) leh Casemiro (£70mtd) te an tel a, nipui transfer-ah Red Devils hian Rasmus Hojlund (£72mtd), Mason Mount(£55mtd) leh Andre Onana (£47mtd) lei nan sum engemaw zat seng mah se, hei erawh tuna report huang chhunga an tel hman loh avangin an man zat hi chhiar tel a ni lo.
United hian hetiang taka squad man to nei chung hian Premier League-ah pathumna dinhmun an hauh pha ṭawk a, manager Erik ten Hag hnuaia an season hmasa ber niin League Cup champion an nih chu nomawi chhuan tur an neih a ni.
Tun season-ah pawh United hian beisei an phak lo rih hle - season hmasa an champion-na League Cup-ah fourth round aṭangin an tla a, Champions League group stage aṭangin an tla bawk.
Premier League table-ah parukna an ni mek a, palina Tottenham Hotspur chu match 24 khelh tawhah point rukin an phak lo mek a, Champions League khelh phak leh phak loh chu an thupui ber a ni rih. FA Cup-ah fifth round lut tawhin, nomawi chawi an beisei ngamna awmchhun a ni mek.
Mahse, United fan-ten tun hnaiah beiseina thar an nei. British sumdawng hausa tawntaw Sir Jim Ratcliffe chuan Red Devils-ah hian 25% stake chu £1.03tld-in a lei a, Nilaini khan Football Association chuan club leh Sir Jim Ratcliffe inremna hi an pawmpui tawh.
European football-a club dang zingah an squad pumpui mana pound tluklehdingawn khat aia tam hmang club dang pathum an awm a, Manchester City, Chelsea leh Real Madrid an ni - Chelsea squad man zat hi June 2022 thleng kha chhut niin, nikum nipui laia £850mtd an sen chu chhut tel a ni lo.