FC Goa an tlawm ve ta

Tun season Indian Super League-a la tlawm lo awmchhun ni reng FC Goa pawhin ngam loh an tawng ve ta a, Nilaini zan khan an mikhual leh elpui Mohun Bagan chu 1-0 in an ngam lo - Dimitri Petratos chuan inkhela goal awmchhun a khung a, Australia international hlui hian tun season inelna hrang hrangah match 23 khela goal 10 a khungna chiah niin, assist vawi nga a nei tawh.

Goa an tlawm avangin table-ah pahnihna an nih chhunzawm a, hmahruaitu Odisha chu point thumin an phak lo mek - match hnihin an khel tlem thung a, an result-ah hian Mizo pariat awmna Odisha pawh an lawm ve khawpin a rinawm!

Hetihlai hian Mohun Bagan chu table-ah pathumna an ni a, oint ngaa Odisha hi phak loin, match hnihin an khel tlem ve bawk. Nilaini zan inkhelah Goan club tan Dinthar tlangval, midfielder Ayush Chhetri chu bul ṭantu zingah a tel a, Mohun Bagan tan Lalrinliana Hnamte chu bench aṭangin a lut thung.

Goa coach Manolo Marquez chuan, "Football-ah chuan a chak zawk nih emaw, khingpui draw reng emaw a theih loh a, tlawm chang a awm ve ṭhin - zaninah pawh chutiang chu kan tawng ve a ni mai," a ti a, an result a hrethiam hle.

Mohun Bagan boss Antonio Habas chuan, "First half kha chu Goa lam chanpual a ni a, player kan thlak kual hnuah kan zia ta hret a ni," tiin inkhel a thlirlet ve bawk.

Bagan hian season hmasa ISL champion puitu coach Juan Ferrando chu an beisei ang result an neih loh avangin January 3 khan an ban a, club technical director leh coach hlui ni bawk Antonio López hi coach thar atan an ruat zui a ni.

Kolkata club hi December khan Ferrando kaihhruaina hnuaiah league match thum chhung a zawna chak nei loin an tlawm a, ISL-a vawi hnih champion pui tawhtu Antonio hnuaiah hian league match thum khelin point sarih an hlawh chhuak tawh thung.