Nadal inkhel thei lo chhunzawm

Rafael Nadal chuan tennis tournament a la khel thei leh rih lo. Spanish star hian Qatar Open khelh ngei tumin thutlukna pawh a siam hman a, mahse chawpchilh takin a inhnukdawk leh ta rih zawk a ni.

Kum 37 mi Nadal hi hliam vangin kum khat deuhthaw a chawl a, kumin January thla khan Brisbane International-ah a lo kir zuai. Inelna lian Australian Open a khel thei leh lo a, a hnuah tournament a la khel leh rih lo.

Grand Slam vawi 22 champion tawh Nadal chuan, "Doha pan ka châk a, inkhelh ngei pawh ka châk takzet. Mahse, tun dinhmunah chuan inkhel turin ka inpeih rih lo a, loh theih lohna avangin ka inhnuhdawh a ngai.

"Ka tan beiseina a bo vek tihna a la ni lo. Tunah hian Las Vegas leh Indian Wells tournament khelh tumin ka inbuatsaih chhunzawm zawk dawn," a ti. Nadal tan season hnuhnung ber a ni tawh a, mahse a la inkhel mumal thei chuang lo.

Nadal hian vawi tam tak a champion tawhna French Open 2024 chu khelh ngei a tum tih a sawi a, nipui laia inelna lian dang Paris Olympic erawh tunah chuan a tichiang thei lo tih a sawi thung.