Cunha hliam a na

Wolverhampton Wanderers forward Matheus Cunha hliam chu a nat thu coach Gary O'Neil chuan a sawi chhuak a, Brazilian forward hliam dam hun tur pawh a sawi chiang thei lo.

Wolves hian Inrinni zan khan an mikhual Brentford chu 2-0 in an ngam lo a, he inkhelah hian Cunha hi minute 24-na lekah malpui hliam vangin lakchhuah a ngai.

O'Neil chuan, "Matheus-a hnathawh thlirin, amah leh kan team tan thil lawmawm lo tak a ni a, tun hnaia a khelh ṭhat dan hi a chungchuang a ni," a ti a, a striker neih hriam tel loa season an hmachhawn a ṭul tur chu a huphurh hle.

Kum 40 mi manager chuan, "Cunha hian a dam leh thuai theih nan theihtawp a chhuah zui a, kar tin, ni tin a hmasawn dan kan thlir reng ang a, engtianga rangin nge a lo kir theih ang tih kan thlir ang," a ti.

Brazil tan pawha vawi 11 inlan tawh Cunha hian tun season inelna hrang hrangah match 28 khelin goal 11 a khung tawh a, assist vawi sarih a nei - tun thlatira 4-2 a Chelsea an hnehna inkhelah khan hattrick a siam.

Wolves hian Cunha chauh an chân lo a, Asian Cup khela a thang bo reng hnuah Hwang Hee-chan chu hliam neiin a lo kir bawk. South Korean forward hi Brentford nena an inkhelah pawh khan a club zawm tawh mah se, a ker rek hliam vangin a inlan lo.

O'Neil chuan, "Chan hian Asian Cup khelin thla khat vel min thangbo san a, mahse, a tel loa khelh kan zir a, Matheus tel loa khelh pawh kan zir a ṭul leh ta a ni," a ti.

Kum 28 mi Hwang Hee-chan hian tun season-ah Wolves tan inelna hrang hrangah match 21 khelin goal 11 a khung tawh a, assist vawi thum a nei bawk - ani erawh inlan thei vat tura beisei a ni.