India-in Asian Cup thlen a duh

All India Football Federation (AIFF) chuan Asian Cup 2027 thlen duhin dilna a thehlut a, Indian FA bakah hian Football Federation of the Islamic Republic of Iran (FFIRI), Qatar Football Association (QFA), Saudi Arabian Football Federation (SAFF) leh Uzbekistan Football Association (UFA)-te chuan Asian Cup 2027 hi thlen duhin dilna an thehlut ve bawk. 

Asian Football Confederation chuan Asian Cup 2027 thlen diltute hian Legal Opinion, Host Candidate Questionnaire leh Sponsor Non-Infringement Undertakings 'form' te chu an thehluh vek tawh thu an sawi a, AFC chuan October 30, 2020 hmain Asian Cup 2027 thlen diltute hian inelna thleng tura mamawhte an tih vek tur thu intiamna lehkha an thehluh leh a ngaih thu an sawi. 

India rama football thuneitu sang ber AIFF hian AFC Women's Asian Cup 2022 an thleng dawn tih a chiang tawh a, nakkum February aṭanga khelh 

ṭan turin FIFA Under 17 Women's World Cup an thleng dawn bawk a ni. 

Asian Cup 2027 thleng tur hi Asian Football Confederation chuan nakkuma puan a nih tur thu an sawi a, Asian Cup khelh hnuhnung ber 2019-ah khan India hi inlan vein group A-ah a thlengtu UAE, Thailand leh Bahrain-te nen an awmho. 

AFC hnuaia ram leh ram inelna sang ber Asian Cup hi kum 2023-ah khelh leh tur a ni a, AFC chuan 2022 FIFA World Cup qualification chu Asian Cup 2023 qualifier atan a hmang nghal. 

Group E-ah Qatar, Oman, Afghanistan leh Bangladesh nena awm ho mekin India hi palina an ni a, Covid-19 vanga chawlh mek qualifier-a an group-ah hian palinaa an tawp a nih chuan Asian Cup qualifying third round emaw playoff round aṭangin Asian Cup 2023 khel turin bul an ṭan leh a ngai ang. 

Chutihrual chuan an chunga awm Afghanistan hi khelh zat inangah point khat chauha an phak loh avangin third round khel tura World Cup qualifier group stage kharna chance a awm a, Asian Cup khel tura tlin nghal an duh chuan a sang pahnih zingah an tel a ngai thung. 

India hi an hmabak match thumah chak vek pawh ni se hmahruaitu Qatar an phak thei tawh lo a, pahnihna Oman um phak tur pawhin thilmak a thlen tel a ngai tawh ang.