Champions League Final khel tur PSG Dan theih loh Neymar, Mbappe & Di Maria

Neymar, Kylian Mbappe leh Angel di Maria te awmna Paris St-Germain chuan Champions League final an lut. European football inelna sang berah hian a vawi khat nana final thleng turin RB Leipzig chu 3-0 in an hneh. Bayern Munich leh Lyon inkhela chak zawn nen Pathianni zan hian nomawi an inchuh ang.

Thawhlehni zan Estadio da Luz, Lisbon-a semifinal inkhelah PSG lamin inkhel thunun chungin hnehna an chang, hremna hmang zo hlim Angel di Maria-a'n goal a khung bakah Marquinhos leh Juan Bernat te thun tur a siamsak bawk - man of the match atan thlan a ni.

Thomas Tuchel-a'n a duh ang takin tlarhma lam a rem thei tawh. Hliam damkawr Kylian Mbappe chu a laiah dahin, winger tlan chak Angel di Maria leh ball thiam bik Neymar ten an thlawp - bench lamah tun season chawhnu lam chauha goal 20 khung tawh Mauro Icardi an la nei bawk.

Midfielder Marco Verratti dam tawh mah se bench lamah dah a la ni a, Brazilian defender Marquinhos chu midfield thunun tura dah a ni. Julian Draxler leh season duhawm hmangtu Pablo Sarabia te chu bench-ah an la awm thei cheu.

Leipzig erawhin hming langsar sawi tur an ngah lo, defender Dayot Upamecano chu an innghahna a ni. Striker Timo Werner hmun ruak luah zo an awm lo a, manager Julian Nagelsmann naute innghahna chu thawhhona a ni.

Benfica khelmual Estadio da Luz-ah hian 2014 khan Real Madrid chuan Atletico Madrid hnehin Champions League nomawi an chawi, man of the match chu Di Maria a ni - he khelmualah bawk hian Argentine winger hi PSG jersey ha chungin a inlan.

Atalanta laka hun tawp dawna goal hnih khungtu Paris club an che fuh hma ta hle, minute 13-na lekah Di Maria freekick chu Marquinhos-a'n chiang zetin a tauh lut. Chawlhlawk hma chiahin Di Maria hian goal hnihna a khung, goal a khung theih nana Neymar-a 'flick' mawizia kha!

Mbappe leh Neymar ten Leipzig tlarhnung an chhaih mangang zui a, goal erawh an neih belh mai lo. Brazilian forward hian keeper Peter Gulasci rin lohna lamah rem hre takin freekick a pet a, goal ban a per dawp. French rawlthar duhawm Mbappe-a'n defender a tlan pelh hnuah goalkeeper Gulacsi a paltlang lo bawk. 

German club tan Yussuf Poulsen-a'n hun ṭha nei ve mah se Dani Olmo-a pass chu goal pawnah a pet. PSG bawkin goal an khung, minute 56-naah Bernat chuan an goal thumna a tauh lut, a siamsaktu chu Di Maria tho a ni.

Neymar, Mbappe leh Di Maria ten Leipzig tlarhnung an pal darh a, goal thum khungin chak chiang viau mah se a aia tam khung thei an ni. Arab sum an hman hnem man chu an hmu ngei dawn ni pawhin a lang ta, hmabak erawh a la hautak dawn.

Barcelona forward hlui Neymar-a'n goal khung lo mah se a siamsak. Brazil international hian ball thunun thiam chungchung a nihzia a lantir zel a, Atalanta an hneh ṭum ang bawkin khingpui defender hmaa ball a chhaih vel chu hmuhnawm a tling.

PSG tan bik Neymar-a'n Champions League match 23 a khelh aṭangin goal 19-ah a inrawlh tawh, goal 14 khungin assist vawi kua a nei - amah thlawp tur hian tawnhriat ngah Di Maria a awm a, boruak sanga kawlhrawng thei tak Mbappe a la awm bawk.

Hmatawng pathum hian tun season-ah match 12 chu bul an ṭan rual a, chak loh vawi khat chauh an nei. Sum tam tak sengin player ṭha lei ṭhin mah se tuna an hmatawng anga inkawp rem hi chu an la nei ngai meuh lo - Laurent Blanc leh Unai Emery te neih loh neitu Tuchel hi a vannei viau.

*    PSG hi European Cup/Champions League final lut thei team 41-na an ni.

*    AS Monaco (2004) hnuah PSG hi French club zinga UCL final thleng leh thei hmasa ber an ni.

*    Real Madrid chuan 2011-2014 chhung khan UCL match an khelh 34-ah a zawnin goal an khung vek a, goal khung zawn record hi PSG-in an nihrual.

*    Final khelhna tur Estadio da Luz-ah hian 2014 final khan Di Maria hian Real Madrid a champion pui tawh a, man of the match atan thlan a ni hial.

*    Tun season Champions League-ah Neymar-a'n woodwork vawi thum a tih per tawh, Lionel Messi nen an tih per zat a inang.

RB LEIPZIG (3-4-2-1): Gulacsi; Klostermann (Orban 82'), Upamecano, Mukiele; Laimer (Halstenberg 62'), Kampl (Adams 64'), Sabitzer, Angelino; Olmo (Schick 46'), Nkunku (Forsberg 46',); Poulsen. 

Manager: Julian Nagelsmann.

PSG (4-3-3): Rico; Kehrer, Silva, Kimpembe, Bernat; Herrera (Verratti 83'), Marquinhos, Paredes (Draxler 83'); Di Maria (Sarabia 87'), Mbappe (Choupo-Moting 86'), Neymar.

Manager: Thomas Tuchel.

Paris St-Germain inkhel hi a hmuna en theih a ni lo, Lisbon-ah kal thei lo mah se PSG fans tam tak chu Paris kawtthlerah an kal chhuak. Parc des Princes kiangah an pungkhawm bawk; a huhoa en tawk pawh an awm - hnehna an chan hnu phei chuan final an luh lawmin an pungkhawm hnem hle.

Covid-19 vangin mahni duh thua mipui punkhawm ngawt a la rem si lo, police lamin 'tear gas' hmangin mipui pungkhawm hi hnawhdarh an tum a, mahse an kal darh duh meuh lo; lawm avangin Paris kawtthler chu a su hulh hulh a ni ber mai. Mipui an pungkhawm a ni satliah lo, lawm avangin an au beng chheng a, hal mawi chi hrang hrang nen chak an lawm - kawng zawhin lirthei chhunga chuangte pawhin ring tak takin 'horn' an hmet tuarh tuarh mai a ni.

Inkharkhip a nih hnuah Champions League hi Portugal-ah khelh chhunzawm a ni a, stadium ruakah an khel. PSG ang tho hian club dang pawhin hnehna an chang a nih chuan an mahni ramah an lawm zelin a rinawm, a bikin final khelh zawhah mipui an punkhawm tam a rinawm bawk.

RB Leipzig manager Julian Nagelsmann hi a naupan avangin a lar a, kum 33 mi nichungin khawvel manager ṭha zinga mi a ni tawh. Chutihrualin hriat tel tur erawh Thomas Tuchel hi Nagelsmann-a chher liantu a ni a, coach nihna hun remchang siamtu a ni. Nagelsmann hian Tuchel lakah bat tam tak a nei a, amaherawhchu lawmthu sawi nana chak loh erawh a tum a ni lo.

Champions League semifinal-ah hian Tuchel-a hote hian goal an khung hma a, inkhel an thunun tel bawk. Nagelsmann-a hote erawh inelna sangah an tawnhriat neih tlemna a lang a, goal hnuhnung pahnih hi tihsual vanga an chhuah ve ve a ni.

PSG coach Thomas Tuchel chuan, "Hahdam takin ka awm lo, goal khung ringawt kha sawi vul theih a ni lo. Tlarhnung lamin kan goal an venhim dan pawh kha a pawimawh hle, hnehna chang tur chuan inkhairual taka kan chet tlan a ngai ṭhin. "Hun remchang kan neih ve leh khan na taka nawr kan duh, chumi tura Angel, Kylian leh Neymar kan nei kha kan vannei hle. Khingpuite hriat chian a ngaih ang bawkin mahni theihna a khelh chhuah a pawimawh, ka naute khan hlawhtlinna duha an tuihalzia an lantir," a ti.

Leipzig coach Julian Nagelsmann chuan, "A tir lam minute 10 chhung vel kha chu kan khel ṭha, a hnu lam erawh PSG lam chan a ni thung. Goal hnih kan phurh hnuah khan thawhchhuah theihna hun ṭha chu kan nei, mahse Paris lam khan player an neih ṭhat em avangin a harsa, an tisual ve duh lo. "Keini chauh hi Neymar leh a ṭhiante dang thei lo kan ni bik lo, indem lutuk tur a ni lo ang. Player naupang rual tak chungin hetiang dinhmun hi kan thleng thei a ni a, season tharah tun aia ṭha zawka khelh kan tum ang," a ti.