Andy Murray a inpeih

Hliam vangin season thum chhung deuh thaw Andy Murray a buai tawh a, tunah chuan a dam fel tawha ngaih a ni. Britain tlangval hian US Open khel tura a inpeih thu a sawi a, zanin dar 9:30 hian Japanese player Yoshihito Nishioka nen an inhmachhawn ang.

Kum 33 mi Murray hian 2012 khan Flushing Meadows, New York-ah hian hlawhtlinna a lo chang tawh. Kuminah hian champion tura rinkai zingah tel phak lo mah se mipui ngaihven chu a ni dawn tho.

Grand Slam vawi thum champion tawh Murray chuan, "US Open ka khelh hnuhnung ber kha chuan khel bawr na avangin ka buai, tennis khelh hi nuam ti viau mah ila na nei chung chuan a hlimawmna a awm thei lo.

"Tun ṭumah erawh na ka nei rih lo, kar hmasa khan tournament ṭha takin ka khel thei leh tawh. Duhthusam thleng lo mah ila player ṭha ka la hneh thei a ni tih ka lantir avang khan inrintawkna pawh ka nei sang," a ti.

US Open inbuatsaihna Western & Southern Open-ah Murray hian world number 7 Alexander Zverev a hneh thei a, last 16 thleng mah se Wimbledon finalist hlui Milos Raonic a ngam lo thung.

Murray-a'n Grand Slam a khelh hnuhnung ber chu 2019 Australian Open kha a ni. Melbourne Park-ah pawh hian hliam vang bawkin buaina a tawk, a inkhelh bakah player hrang hrangin thlahna video an siam chu chhuah a ni hial.

Khel bawr leh hnungzâng na vangin a buai ngun hle. Amaherawhchu a harsatna hi inhnehtir duh loin training a nei chhunzawm a, tunah chuan inkhel turin a inpeih leh tawh. Murray chuan, "Inelna lian hmachhawn turin rilru ka siam fel tawh," a ti.