Dream11-in IPL 2020 an sponsor dawn

IPL Governing Council chuan nimin khan Dream11 chu kum 2020 atana Indian Premier League title sponsor a nih thu an puang.

Mumbai, Maharashtra-a innghat Dream 11 hi Sports Tech (Fantasy Sports) company a ni a;  cricket, hockey, football, kabaddi leh basketball-ah te fantasy game an nei. Dream 11 hi infiamnaah thuk takin a inhnamhnawih a, tunah hian sports league 19 bakah IPL club paruk nen an thawk ho.

IPL title sponsor ṭhin chu Vivo a ni a, Chinese company leh BCCI hian kum 2017 khan kum nga chhung atan vaibelchhe 2,199 in inremna an ziak. BCCI hian Vivo aṭang hian kum khatah vaibelchhe 439.8 an lalut tihna a ni a, hemi a nih avang hian India rama cricket thuneitu sang pawhin Chinese company nena inthlunzawmna tih chah hi an hreh hle.

Amaherawhchu India leh China inkar boruak a chhiat avangin BCCI pawhin loh theih loin an inremna an chhu chat a, sponsor-tu thar an zawng. Dream11 hian kum khat atan vaibelchhe 222 in sponsor hi an dil a, Byju leh Unacademy dilna vaibelchhe 201 leh vaibelchhe 170 aiin an sang zawk. BCCI-in IPL sponsor-na atana beisei zat pha lo mah se an hmuh san ber a nih avangin an pawm a ṭul.

IPL governing council chairman Brijesh Patel chuan nimin khan Dream11 nena an inremna hi vaibelchhe 222 a nih thu a puang a, BCCI-in vaibelchhe 200 bawr vel chu an hloh dawn tihna a ni.

IPL vawi 13-na hi March 29, 2020-a khelh ṭan turin ruahmanna siam a ni a, amaherawhchu coronavirus vangin April 15, 2020 thleng atan a hun sawn lailawk a ni. April 14-ah Indian prime minister Narendra Modi-a'n May 3 thleng atan ramchhung lockdown a puan tak avangin BCCI pawhin IPL chu tiam chin awm loin a titawp.

India ramah Covid-19 in reh lam a pan lo a, a pung chho zel. Ramchhungah khelh theih a nih tak loh avangin UAE-ah khelh a ni dawn. IPL2020 hi September 19 aṭangin UAE-ah khelh ṭan a ni ang a, November 10-ah final khelh a ni ang. Inelna hian ni 53 chhung a awh ang a, tlai 3:30 leh zan dar 7:30-ah te khelh tur a ni. Tlai lam inkhel hi match 10 a awm ang.

UAE-ah hian khawpui pathum Dubai, Sharjah leh Abu Dhabi-ah te khelh a ni ang. IPL neih rual hian Women’s T20 Challenge neih a ni nghal dawn a, hmeichhe inelnaah hian team pathum awmin match li a awm ang.

IPL 2020-ah hian Chennai Super Kings, Delhi Capitals, Kings XI Punjab, Kolkata Knight Riders, Mumbai Indians, Rajasthan Royals, Royal Challengers Bangalore leh Sunrisers Hyderabad te an awm.

Covid-19 vangin tun ṭumah hian team pakhatah a tam berah player 24 chauh an awm thei ang.  Team tin hi hotel hran ṭheuhah dah an ni dawn a, player tin hi room hran ṭheuhah an awm ang. UAE-ah hian ni ruk chhungin Covid-19 test vawi thum neih ṭhin tura ruahman a ni.