Zanin dar 11-ah Manchester City Vs Chelsea

Manchester City leh Chelsea te zanin dar 11:00 hian Etihad Stadium-ah an inkhel dawn. Premier League club ṭha pahnih hi tun dinhmunah an point inthlau deuh mah se an inkhel tur hi chhan hrang hrang vangin en a chakawm.

Pep Guardiola hote hi champion nawn tum an ni a, Mauricio Pochettino erawhin London club tana manager hna thawk chhunzawm zel turin club lian a elpha tih a lantir a ngai thung. Chelsea hian league nomawi beisei pha tawh lo mah se City nomawi chawi nawn tur dal theitu an ni a, point an hmuh phawt chuan Liverpool leh Arsenal te lawmah a tla ang.

KDB leh Haaland telna

Man City hian hliam vangin an player pawimawh Kevin De Bruyne chu season chawhma lamah an chhawr thei lo a, hliam vangin goal khung khawl Erling Haaland pawh thlasik laiin hun rei tak a awl bawk.

Pep-a hote hian November leh December thla tirah point an hloh nasa a, league match ruk chhung vawi khat chauh an chak a; vawi li ngawt khingpuite inhnehtawkpui a, vawi khat chak loh an nei. A tawi zawng chuan point 11 ngawt an hloh tihna a ni.

Mahse, season tawp lam boruaka an ṭhat lai ber hun tawng ṭhin Man City an harchhuak leh tawh a, league match rukah a zawnin a chak leh tawh. Kevin de Bruyne rawn kir chu an ṭhatpui tih hai rual a ni lo.

Belgian midfielder KDB hi season chanve lek khel chungin Premier League player of the season a dawn theih ringtu pawh an awm hial. De Bruyne hian minute 412 khelin assist vawi riat a nei leh der tawh. A tawi zawng chuan minute 2815 khel Bruno Fernandes (assist 7) leh minute 2430 khel Martin Odegaard (assist 6) te aiin KDB hian ṭhiante goal khung tur a siam leh tawh zawk.

Haaland pawh hi KDB ang thoa danglamna thlen theitu a ni a, inhliam vangin league match ruk khel thei lo mah se goal 16 khungin top scorer a la ni mek.

City ṭhatna tak erawh KDB leh Haaland awm loh pawhin an la ṭha tho a; season dang zawng aiin Phil Foden a rintlak a, Julian Alvarez leh player thar Jeremy Doku te hi team dang tan buaina tham vek an ni.

Chelsea ve thung

Season tluan deuh tho Man City an kheh ṭhat ṭhin laiin Chelsea erawhin chet ṭhat ṭum an nei leh zeuh ṭhin. Tun hi Blues chet ṭhat lai a ni a, Aston Villa leh Crystal Palace te 3-1 ve vein an hneh. Mauricio Pochettino hote hian City an hneh leh bawk chuan Liverpool nen League Cup final-ah inrintawkna an ngah phah sawt ang.

Argentine boss Poch hian Tottenham a enkawl laiin Pep-a enkawl Man City hi Champions League semifinal-ah an vel tawh. Pep chuan, "Chelsea kan tum dawn. Aston Villa nen an khel ṭha em em a, Crystal Palace laka an khelh dan pawh kan en. Inrintawkna nen an khel a, chuvangin keini pawhin kan rilru zawng zawng Chelsea-ah kan pek a ṭul a ni," tiin a sawi.

Sterling tan a pawimawh

Raheem Sterling-a'n Man City tan kum sarih chhungin nomawi 11 a chawi a, Etihad Stadium-ah lawm a la hlawh reng ang. English forward hian Pep Guardiola hnuai bikah match 292 a khel a, nomawi 11 zinga 10 hi Pep-a ho an champion a ni.

City tana a khelh laiin Sterling hi England tan pawh player pawimawh a ni a, tun hnaiah erawh an ko lo tam zawk. Euro 2024 khel turin Sterling tan City laka chet ṭhat a hi a pawimawh. English forward hian City tana a kheh laiin league-ah goal 10 a khung tling deuh zel a, goal 20 khung ṭum te a nei. Chelsea tan season liam ta khan league-ah goal ruk chauh a khung a, tun season-ah goal nga a khung tawh. A goal khung dan aṭanga thlir chuan Sterling vanglai chu a ni lo a, match hnuhnung pahnihah pawh bench aṭangin a lut.

Palmer tan phuba

Cole Palmer-a'n Man City a la chhuahsan duh lo a, khelhna hmun a chang lo a nih chuan loan hmanga intuai hriam tura chhuah a duh. Mahse, City-in loan hmanga chhuah an phal loh avangin Chelsea pan a thlang.

Stamford Bridge-ah Chelsea leh Man City te hi 4-4 in an inhnehtawk tawh a, hemi ṭuma siphurh sutna goal khungtu chu Palmer a ni. Etihad Stadium-ah Palmer hian a theihna lantir a duh dawn a, zanin inkhela player en chakawm zinga mi a ni.

Palmer hian Chelsea tan match 28 khel tawhin goal 12 a khung bakah assist vawi kua a nei tawh. City academy chhuak Palmer chuan, "Stamford Bridge-ah chuan ka hmachhawn tawh ngei mai a, mah se Etihad Stadium-a City hmachhawn chu a mak lehzual dawn. Manchester chhuahsan tura thutlukna siam kha a harsa a, chutihrualin kar tin inkhel thei tlaka ka ngaih tawh vang a ni. Manager-in (Poch) zalenna min pe a, inrintawkna min pe a, nuam ka ti tawh hle a ni," tiin a sawi.

Enzo leh Caicedo

Chelsea hian khawvel defensive midfielder manto pahnih Enzo Fernandez leh Moises Caicedo te an kawl a, heng player pahnih ringawt pawh hi inchhuanpui tham an ni. Mahse maw, khelh ṭhat ṭum leh chhiat lai an nei a; tlarhnungah Thiago Silva leh Axel Disasite an kawl chungin goal ṭhahnem tak chhuah ṭum an nei tlat.

Liverpool-in Anfield-ah Chelsea hi 4-1 in an sawp a, Reds hi goal hmaah an vanduai zawk. Enzo leh Caicedo ten Jurgen Klopp-a naute dan ngaihna an hre lo. Tun ṭuma an hmachhawn tur Man City hi Reds nena Premier League nomawi inchuh mek an ni a, Pep-a hote hi Klopp-a naute ai pawha ṭha zawka ngaih a ni.

Enzo leh Caicedo man belhkhawm hi pound maktaduai 200 chuang a ni a, City hmaah an man an phu em tih a chiang dawn. City player pawimawh Mateo Kovacic, Jack Grealish leh Bernardo Silva te dinhmun a chiang lo mah se KDB bakah Rodri leh Phil Foden te an la kawl tih a hriat a ṭha.

Chelsea tan point hmuh a harsa dawn tih a chiang a, point an hmu hlauh a nih chuan anmahni chauh ni loin Arsenal leh Liverpool ṭantute an lawm tel ang tih a chiang.