Kan hun ṭha hi bawhpelh lo ang u - Mizoram coach

Mizoram team chuan Santosh Trophy final round khel turin ngawrh takin RG Stadium, Mualpuiah January 10, Nilaini aṭangin training an nei ṭan a, tukin hi ni 34 an training-na leh a tawp berna tur a ni ang.

Mizoram coach Lalsangzuala Hmar chuan, "In tihsual hian kei chu ka rilru a na ṭhin asin. Practice match-a goal kan chhuah chhan kha scooty ka khalh laite, ka mutnaah te ngaihtuah a, muthilh te harsat phah ṭhin. Kan rilru leh theihna zawng zawng kan pe a, in lak aṭangin chutiang tho chu ka beisei," tiin nimin zing training-naah player-te a fuih.

Coach Sanga chuan chhunzawmin, "Mizoram team hi ka lo enkawl tawh a, vawi hnih semifinal-ah ka tlakpui. Ka tan hian hun ṭha a awm leh tawh dawn lo a nih hi ka tih hnuah MFA-in Mizoram enkawl turin min ruat a, MFA chungah pawh ka lawm. Tuna kan senior player Sawmfela, MSa leh midangte pawh hun ṭha in nei reng dawn lo, keipawhin ka nei reng dawn lo - hun ṭha hi i bawhpelh lo ang u," a ti.

Mizoram hian kum 2018 hnuah a vawi khat nan Santosh Trophy final round an lut leh chauh a, coach Sanga hnuaiah hian Mizoram hian kum 2017 leh 2018 khan semifinal lut ve ve mah se final an thleng zo lo. Santosh Trophy-a Mizoram champion chhun chu kum 2014-a H. Vanlalthanga hoa nomawi an chawi kha a ni a, hemi hnu hian final an la lut leh lo a ni.

Tun ṭumah hian Mizoram hi Karnataka, Maharashtra, Delhi, Manipur, leh Railways te nen group khatah an awm ho a, group khat aṭangin team paliin quaterfinal an lut dawn. February 18, Pathianni hian Mizoram hian inelna neihna hmun tur Itanagar, Arunachal Pradesh panin Aizawl an chhuahsan ang.