PSG chhuahsan duhtu Kylian Mbappe

Kylian Mbappe chuan a khelh mekna Paris Saint Germain chhuahsan a duh, tun season tawp ruala a contract neih lai tawp mai tur chu pawhsei a tum lo - man nei loin club dang a zawm thei dawn tihna a ni.

France captain thusawi hi a ngial a ngana lak chhuah tur chat la awm chiah lo mah se, khawthlang chanchinbu rintlak tak takte chuan Mbappe hian a chhuah tur thu hi club thuneitute hnenah a hrilh tawh niin an ziak.

Kum 25 mi Mbappe hian duh ni se la chuan a contract neih lai hi kum khat dang a tan a pawhsei theihna dan a awm, mahse tunah chuan pawhsei a tum lo - Paris club tan chuan chânna nasa tak a ni ngei ang.

PSG leh Mbappe

AS Monaco aṭangin khawvel hriat a hlawh a, rawlthar duhawm a nih laiin Paris Saint Germain hian Monaco aṭangin an la chhuak. PSG tan hian kum sarih hun a hmang tawh, inelna hrang hrangah match 290 aṭangin goal 243 a khung a, assist vawi 93 a nei bawk.

PSG tan chuan ro hlu bik a ni, a kum a la tlemin vanglai hmang mek chauh a la ni. Ligue 1 nomawi ringawt pawh vawi nga a chawipui tawh, kuminah pawh an champion leh ngei a rinawm bawk.

Kum 2022 khan PSG chhuahsan a tum a, mahse rin loh tak maiin PSG tan hian season hnih daih contract a ziak ta zawk a nih kha. Nikum nipui bazar lai pawh khan thawm nei leh mah se tun thlenga chhuak loin a awm zui.

Tuna a lan dan chuan PSG hian man nei loin an chhuah dawn, kum 2017-a an lei khan pound maktaduai 165.7 man a ni daih tawh a, kum 18 mi manah chuan a tam rem rem hle - tam uchuak taka an neih hi man nei loin an chhuah a ngai ta.

Chhuak ta se...

Kylian Mabppe a chhuak dawn tih thawm a awm chuan Real Madrid thawm a ri zui ve nghal. Italian football jousnalist Fabrizio Romano tarlan dan chuan Spanish club lian hian contract an zawrh fel der tawh.

Real Madrid hian thawm nei mah se ualau takin an la lantir bik lo. Mbappe hian a duh a nih phawt chuan kumin January thla aṭang khan a club duhzawng a be theih tawh, hei ho contract neih danah pawh a tel.

Sum tamna Saudi Pro League pawhin thawm an nei leh ngei ang. Al Hilal chuan khawvela player man tam ber ni turin Mbappe hi an lo dawr tawh a, mahse pound maktaduai 259 tehmeuha an dawrna chu a lo hnawl tawh a ni.

A lan dan chuan Mabppe hian sum aiin football huanga hlawhtlinna a la dap hmasa zawk a, sum tam tak hlawh chunga Europen football huanga hlawhtlin chu a duhthusam a ni ang - Real Madrid aia thlan tur dang a awm kher lo ang.

Hlawh chungchang

Paris Saint German forward hian tun dinhmunah engzat chiah nge a hlawh tih hi tarlan a ni lo, a lan dan chuan kum khatah pound maktaduai 171 vel bawr a hlawh niin an sawi a, a tam tham rem rem hle.

Chanchinbu mite tarlan dan chuan, Real Madrid chuan Mbappe hlawh tur zat hi an phal ang tawk an tichiang tawh a, hei hi amah pawh an hrilh tawh - a zat tak tarlang lo mah se kum 2022-a hlawh pek an huam zat aiin a tlem, an ti.

An indawrna hmasa a hlawhchham khan Real Madrid president Florentino Perez chu a lungawi lo hle niin an sawi. Mbappe pawhin a thu a sut leh avangin Perez hi a zah a, amah leh a team ngei pawhin a nihna tak an hrilh.

Tunah chuan Mabppe leh Perez te bawk an indawr leh dawn tihna a ni a, nipui bazar a ngaihnawm dawn - hma takah an inchingfel thei bawk. Chutihrualin PSG hian thapui an thawh leh thut lo ang tih a sawi theih bik loh bawk a ni.

Galacticos a tawp?

Arab sum an hman chinah PSG hi nasa takin an insiam lian a, an player duhzawng chu an la thei viau. Ligue 1 chauh ni loin Champions League nomawi chu club thuneitute duh ber a ni a, a la ni reng bawk.

Lionel Messi, Neymar leh Mbappe te an kawl kawp lai pawh a awm, hetih lai hian 'Galacticos' tiin khawvela club ṭha leh ropui nih an tum, mahse an player ṭha rual pathum hi season tharah meuh chuan kawl an nei dawn ta lo.

Mabppe a chhuah chuan tu nge a hmunruak luah ang tih chu zawhna a ni nghal. Napoli striker Victor Osimhen chu sawizawm a ni ve leh nghal a, ani bakah hian kum 17 mi lek an kawl lai Warren Zaire-Emery lakah beiseina an nei sang bawk.

Engpawh ni se, tu season chu Mbappe hi PSG tan a la khel tluan dawn. UCL quarterfinal lut turin an dinhmun a ṭha tawh a, tunah chuan zanin dar 1:30-a Nantes nen Ligue 1 an khelh tur atan a rilru a pe rih ang.