South Korea-in Klinsmann an ban

Asian football powerhouse South Korea chuan an coach Jurgen Klinsmann an ban a, German coach hian World Cup 2026 thleng Korea-ah hian contract nei mah se, Asian Cup semifinal an paltlang zawh loh hnuah ban a ni ta zawk.

South Korea hian February 6 zan Jordan chu Asian Cup semifinal-ah an ngam lo a, FIFA ranking-a anni aia hmun 64 zeta hniam zawk laka an tlawmna hi thuneitu lamin an hrethiam thei lo.

Korea Football Association (KFA) president Chung Mong-gyu chuan, "National coach aṭanga kan beisei hruaitu ṭha nihna chu Klinsmann-ah hian kan hmu lo a, national team tuai hriam nana tih tur hrang hrangte a titawk lo a ni," a ti a, German coach an ban chhan a sawi.

Kum 59 mi Klinsmann hian nikum February khan South Korea coach hna hi a chelh ṭan a, thla 12 chiah a cham hman tihna a ni. Jordan laka an tlawm hlim khan Klinsmann hian a ban loh tur thu sawi mah se, Ningani khan National Team Committee chu ṭhukhawmin, KFA hnenah German coach hi ban mai turin thurawn an pe.

World Cup 2026-a Germany pathumna lo nih pui tawhtu Klinsmann hi South Korea fans zingah a tla na lo hle. National team a enkawl chung hian California-ah a la awm reng a, South Korea a enkawl tirh thla ruk chhung khan Seoul-ah ni 67 chiah hun a hmang niin Korean media-te chuan an sawi.

South Korea hi Asian Cup-ah khan an boruak a ṭha tawk lo nia sawi a ni a, semifinal khelh hmaa an tlai chaw einaah intihbuaina chhuakin, buaina ṭhelh mih tumtu captain Son Heung-min chuan a kutah hliam a tuar hial.

Buaina siam zingah Paris St-Germain attacking midfielder Lee Kang-in a tel a, hma taka chaw ei kham a, table tennis khel tura player naupang ṭhenkhat an chhuak chu Son hian a hrethiam lo a, chaw ei chu team member-te titi hona huna hman a duh vang niin, buaina hi a chhuak zui niin an sawi.

South Korea hian Asian Cup-ah khan minute 90 chhunga chak vawi khat chiah an nei a, a tawpah coach-in a tuar.