Salah-a'n training a zawm

Liverpool fan-te tan chanchin lawmawm hriat tur a awm a, an thiampuipa Mohamed Salah chuan training a zawm leh tawh - zanin dar 6:00-ah league match khel turin Brentford an lenchilh zui dawn a, Salah-a'n bul a ṭan nghal erawh a rinawm lo.

Kum 31 mi Salah hian Reds tan AFCON khel tura a zin chhuah hma khan inelna hrang hrangah match 27 khel hmanin, goal 18 leh assist vawi kua a nei hman.

Mahse, Diogo Jota, Darwin Nunez, Cody Gakpo leh Luis Diaz te an awm ve avangin hliam damkawr Salah chhawr nghal ai chuan Jurgen Klopp tan player dam ṭha sa chhawr mai chu a finthlak ang.

Hetihlai hian damlohna avanga league match hnuhnung bera inlan thei lo Alisson Becker leh Joe Gomez te pawh an dam leh tawh a, zaninah Klopp-a'n a duh chuan a chhawr thei dawn.

Hliam vangin Dominik Szoboszlai leh Trent Alexander-Arnold inlan theih a la rinawm lo a, Arnold hmun ruakah training nei leh tawh Conor Bradley chu inlan thei tura beisei a ni a, Szoboszlai awm lo hi Reds tan a pawi thui thei.

Alexis Mac Allister leh Wataru Endo ten tlarhma puih aiin number 6-a khelh nuam an tirih zawk niin a lang a, chuti a nih chuan Ryan Gravenberch, Harvey Elliott leh Curtis Jones te zinga a tu emaw berin mawhphurhna an lak a ṭul ang.

Liverpool hian Premier League table chung ber luah mekin, an hnuai chiaha awm Manchester City aiin point hnihin an sang zawk a, match khatin an khel tam thung.