Shaw dinhmun a chiang lo

Manchester United-in Luke Shaw dam hnuah match li a zawnin a chak tawh a, amaherawhchu English left back hi match hnuhnung bera Aston Villa an hneh ṭumin inhliam vanga lakchhuah a ni. February 18, Pathianni zan dar 10:00-a Man United-in Luton Town an tlawh hunah Shaw dinhmun hi a chiang lo.

Erik Ten Hag chuan, "A inhliam tawh dan thlirin kan thlak mai hi kha a finthlak a, Luton nen an inkhelh hunah a inlan theih nan theihtawp kan chhuah ang," tiin a sawi. Shaw bakah hian Tyrell Malacia leh Aaron Wan-Bissaka te an inhliam a, mual sira chhawr theih tura awm chu Victor Lindelof leh Diogo Dalot te an ni ang.

Man United tana chanchin lawmawm erawh striker thar Rasmus Hojlund-a'n goal a khung ṭan a, rawlthar duhawm Alejandro Garnacho leh Marcus Rashford te nen season ṭantirh lam aiin an goal bawh a na ta zawk.

Nikum November khan Man United hian Old Trafford-ah Luton hi 1-0 in an hneh hram. Premier League kai thar hian Mads Andersen, Tom Lockyer leh Marvelous Nakamba te chhawr thei dawn lo mah se Man United tan fimkhur a ṭul ang. Luton hian kuminah Newcastle United 4-4 a an chelh bakah Brighton 4-0 in an hneh thei tih hriat a ṭha.