Hun pawimawh lai ber a ni - Arteta

Arsenal manager Mikel Arteta chuan Premier League season kal laiah, an hun tawn mek chu a pawimawh lai ber a nih thu a sawi. Zanin dar 8:30 hian Burnley an lenchilh ang.

Arteta chuan, "Kan thil tum tihlawhtling tur chuan eng inkhel mai pawh hi a pawimawh em em vek. Burnley hian coach ṭha tak kaihhruaina hnuaiah khelh dan phung nghet ṭha tak an nei a, chuvangin tun ṭuma kan intawn tur hi a hautak hle ang.

"Season kan hman laiah hian thil ṭha leh duhawm tam tak kan titawh a, ṭha leh ngelnghet takin rei tak kan khel thei a ni tih pawh a takin kan lantir tawh. Kan nihna tak hi kan lanchhuah tir zel pawh a ngai," a ti.

Arsenal hi hliam vangin an buai ve zeuh zeuh, midfielder Thomas Partey a dam hleithei lo a, striker Gabriel Jesus pawh match hnuhnung pahnihah a inlan thei lo. Emile Smith Rowe, Oleksandr Zinchenko leh Fabio Vieira te pawh an chawl mek.

Arteta chuan, "Player ṭhenkhat chuan training an rawn zawm leh tawh, match khelh hmain training hmabak kan la nei bawk. Chung hunah chuan an dinhmun tak ngaihchan a ni ang," a ti. Vawi khat atan match khat bak ngaihtuah thei an nih loh thu a sawi bawk.