La Liga-in Barca lam an ṭang
Barcelona leh Lionel Messi buaina chungchangah La Liga an ṭawng chhuak ve ta a, Spanish top flight league thuneitute chuan Barcelona-in a thlawna Messi chhuah an phal lo chu a dik thu an sawi.
Kum 33 mi Messi hian August 25 zan khan Barcelona chhuahsan a duh thu club board hnenah lehkhathawn hmangin a hrilh a, a contract-ah season tawp apianga a thlawna chhuah theihna dan a neih avangin a dan neih sa chu zahsaka chhuahtir turin Barca thuneitute a ngen.
Mahse, Barcelona hian season tawp apianga Messi chhuah theihna dan hi June 10 khan a tawp tawhah an ngai a, Messi erawhin Covid-19 vanga season a tawp tlai avangin a ṭanna hi a dikah a ngai thung.
Hetiang boruak karah hian La Liga chuan thuchhuah siamin, "Release clause-a (euro maktaduai 700) a inziah anga sum pek tur zat pek a nih loh chuan Spanish football federation hnuaia player hming ziah luh chu thai bo a ni lo ang," an ti.
La Liga-in Barcelona lam an ṭang hi thil awm lo a ni hran lo - Messi hian Spain a chhuahsan a nih chuan Spanish top flight football hian sum lakluh kawngah nasa takin a tuar dawn tih a lang chiang a, Barca lama ṭan an thlang a ni ber.
Messi hi Pathianni khan club-in Covid-19 test an kalpuinaah a inlan duh lo a, Barcelona player anga a inngaih tawh loh vang a ni. Nimin training-naah pawh Messi a inlan lo a, first team player 18 chu nimin training-naah hian an tel lo.
Samuel Umtiti leh Miralem Pjanic chu Covid-19 an kai avangin an la inkhunghrang rih a, Bayern Munich tana Champions League nomawi chawitu Philippe Coutinho chu chawlh pek a la ni a, goalkeeper Marc-Andre ter Stegen chu hliam vangin a chawl mek bawk.
La Liga-in Barca lam an ṭang
La Liga-in Barca lam an ṭang
Player langsar zingah Antoine Griezmann, Frankie de Jong leh Sergio Busquets-te chu international match khelh tur an neih avangin an ram team lamah an awm rih a, player dang 10 an hming tarlan lem loh chu international duty-in an awm bo bawk a ni.