Kartawp inkhel - Xavi-a Barca tan insiamṭhat hun

Barcelona chuan zanin dar 11:00 hian league match an khel dawn a, khualmualah Celta Vigo an lenchilh dawn - Catalan club hian an league match hnuhnung berah Granada chu 3-3 in an inhnehtawkpui a, fan-ten zaninah Catalan club chak lai hmuh an duh ang.

Zanin dar 6:30 hian Atletico Madrid an inlan dawn bawk a, Barca ang thoa beisei phak lo team hian Las Palmas an mikhual dawn. An league match hnuhnung bera 1-0 a Sevilla ngam lotu Atletico tan tun hi insiamṭhat hun a ni.

Pathianni zan dar 6:30-ah hmahruaitu Real Madrid chuan Rayo Vallecano an lenchilh dawn a, Real hian an league match hnuhnung berah anmahni hnaih bertu Girona chu 4-0 in an sawp a, league table-ah point nga zetin hma an hruai fal tawh.

Hetihrual hian Champions League round of 16-ah Real hian RB Leipzig chu 1-0 in an hneh hram a, an vannei takzet - zaninah German club laka an khelh dan anga an khel leh a nih ngat chuan chesual thei an ni, tih an inhriat a ṭha.

Xavi beiseina

Barca boss Xavi-a'n season laklawh laiin season tawpah a chhuah tur thu a sawi thut a, football khawvel a barakhaih. Spanish footballer ropui ṭhin hian a rilru leh ngaihtuahna a seng nasa lutuk chu Barca a chhuahsan tur chhanah a puh a, a thutlukna chuan team pawh boruak zangkhai zawka a enkawl tir theih a beisei thu a sawi.

Mahse, beisei ang ngawtin thil a kal reng thei bik lo. Barca hian Osasuna leh Alaves laka hnehna an chan hnuin, table mawng lama talbuai mek Granada chu 3-3 in an inhnehtawkpui hram a, fan-te lungawi loin club hi an au el hial.

Inkhelh zawhah Xavi pawh a lungawi lo a, Spanish coach chuan, "Tlarhnunga kan tihsual avangin hrem kan ni a, a hnung pawp leh ṭhin hian kan season pawh a nih tur angin a nihtir thei lo. Tunah chuan chetsual a thiang tawh lo," a ti a, zaninah an chetsual leh chuan fans aṭangin pressure a na leh zual ang.

Barcelona hian Nilaini zan dar 1:30-ah Champions League round of 16 first leg khel turin Napoli an lenchilh dawn a, Italian club ṭha an hmachhawn hmaa Celta Vigo hneh hi Barca player-ten inrintawk nan an mamawh.

Atletico mawlh hi!

Diego Simeone enkawl Atletico-in an league match hnuhnung pahnih aṭangin point khat chiah an hlawh chhuak a, Real Madrid nen 1-1 a an inhnehtawk hnuin, khualmualah team talbuai Sevilla chu 1-0 in an ngam lo zui.

Atletico hian Copa del Rey semifinal first leg-ah 1-0 in Athletic Bilbao an ngam lo bawk a, February thlaa match thum an khelh tawhah an la chak zo lo vek tihna a ni - he team hian insiamṭhat an mamawh tih loh rual a ni.

Tlarhmaah goal khung thiam Alvaro Morata (19 goals) leh Antoine Griezmann (18) an nei chungin, an match hnuhnung pathumah hian goal khat chiah an khung a, Atletico-in insiamṭhat an mamawh tih loh rual a ni lo.

Madrid khaw club hian Barca ang thoin Champions League round of 16 first leg match khelh tur an nei a, Thawhlehni zan dar 1:30-ah Inter Milan an lenchilh dawn - Serie A hmahruaitu lenchilh tur an ni a, zanin dar 6:30-ah Las Palmas em pawh an hneh thei lo a nih chuan inrintawk a har khawp ang.

Siamṭhat ngai Real

Real-in Pathianni zan dar 6:30-ah Rayo Vallecano an lenchilh dawn a, Vallecano hi season hman ṭhat loh avanga coach nei thar an ni a, thathona nen, beiseina nen Real an lo mikhual dawn - a awlsam lo ang.

Carlo Ancelotti enkawl Real hian an league match hnuhnung berah Girona chu 4-0 in sawp mah se, Champions League last 16 first leg-ah sawisel kai leh harsa tak chungin RB Leipzig (1-0) an hneh hram a, Girona laka inhliam Jude Bellingham awm loh an tuar tih a lang.

Bellingham tel loin Real goal nawr a na tawk lo a, kar thum vel tal a chawlh a ngai dawn. Leipzig lakah Bellingham awm loh vanga bul ṭan Brahim Diaz a khel pangngai viau a, goal awmchhun khungtu pawh a ni.

Mahse, Spanish attacking midfielder hi hliam vanga lakchhuah a ṭul a, Spanish media ṭhenkhat chuan Vallecano a hmachhawn theih tur thu an sawi thung - La Liga-ah vawi khat lek chak loh pawh a la pawi thui thei a, Real-in chak an tum chuan Leipzig laka an khelh dan ang kha chu an bansan a ṭul ang.