Bayern an tho chhuak dawn em?

Bayern Munich-in Bundesliga-a Bayer Leverkusen an hneh loh hnuah Champions League last 16-ah Lazio an hneh loh zui a, kum 2012 hnua a vawi khat nan nomawi chawi miah lo thei dinhmunah an ding.

Thomas Tuchel-a enkawl Bayern Munich hian February 18, Pathianni zan dar 10:00 hian VfL Bochum an tlawh dawn a, an inkhelh meuh chuan Leverkusen nena an inkar hi point riat ni thei dinhmunah a ding. Zanin dar 8:00 hian Xabi Alonso hoten Heidenheim an tlawh dawn a, chak tura ngaih an ni.

Bayern hian tun season-ah tlarhma thuam chakin Harry Kane an lalut a, goal hmaa hriamzia hi khawvel hriat ni mah se England captain hian a football career-ah nomawi lian tham la chawi lo. Bavarians mangchhia thlentu zinga mi a ni thei, tihna a ni.

Kane chuan, "Inkhel pakhat lek emaw engemaw thil tak pakhat lek emaw hian football-ah chuan danglamna nasa tak a thlen thei. Chumi thleng tur chuan training-naah kan thawkrim lehzual ang. Beisei tur kan la nei a, kan tlawm mai mai dawn lo," tiin a sawi.

Bayern Munich hian German football an thunun a, chutihrualin tun hnaiah erawh an talbuai hle. Season liam ta khan match tawp bera Borussia Dortmund chetsual vang chauhin Bavarians hi an champion a, tun season-ah pahnihnaah awmin point ngain Leverkusen an pha lo mek.