UCL khelh ngei kan tum -Allegri

Juventus manager Massimiliano Allegri a ṭawng fimkhur hle a, tunah chuan Serie A champion ni loin season tharah Champions League khelh phak chu an thil tum a nih thu a sawi chhuak.

Tun hnaiah Juve hi an chesual zauh zauh, hmahruaitu Inter Milan an phak lohna chu point sarih lai a ni tawh a, a chunga awm Inter hian match khatin an la khel tlem bawk a ni.

Old Lady manager Allegri chuan, "Kan match hnuhnung pathumah point khat chauh kan hmu, kan dinhmun hi hriatthiam a harsa rih hle. Inter Milan hi a hneih thei ang bera awm kan la tum tat dawn.

"Chutihrualin, tunah kan thil tum ber chu season thara Champions League khelh phak a ni, season hmasa khan hrem kan nih avangin kan tan a harsa, kuminah chuan engkim hi kan kutah a innghat," a ti.

Juve hian zanin dar 10:10 hian Hellas Veron an lenchilh dawn, an chesual leh a nih chuan an tan Serie A nomawi beisei ngam a harsa tawh ang–pathumna AC Milan lakah pawh an dinhmun hloh thei reng an ni tawh, fimkhur an ngai takzet.