Villarreal defender hluiin East Bengal zawm

Serbian defender Aleksandar Pantic chuan season tawp thleng khel turin ISL club East Bengal a zawm a, kum 31 mi centre back hian hliam vanga tun season-a inlan thei tawh lo tur Jose Antonio Pardo hmun ruak a luah ang.

Serbia Under-19 leh U21 tan pawha lo khel tawh Pantic hian European football-ah tawnhriat a nei hrawl hle. Spanish club hriat hlawh Villarreal, Cordoba, Eibar leh Alaves-ah te pawh a lo khel tawh a, an ram club ṭha Red Star Belgrade leh Ukrainian club lar Dynamo Kyiv tan a khel tawh bawk.

Pantic hian season chawhma lam khan Cypriot first division club Doxa Katokopias FC tan a khel a, La Liga-ah ringawt pawh season li khel tawh a nih avangin a tawnhriat ringawt pawh hi East Bengal tan chuan a ṭangkai ang.