Jamshedpur-in Punjab an sawp

Kumina ISL match hnih an khelhah Punjab FC an la chak ve ve a, mahse, Khalid Jamil-a enkawl Jamshedpur FC an tawn meuh chuan an thawnthu her danglamin a awm - an mikhual lakah 4-0 in an tlawm a, Khalid-a'n ISL match li a khelhpui aṭangin Men of Steel hi point riat a hlawhchhuahpui ta.

JFC tan Jeremy Manzorro chuan goal hnih khungin, Daniel Chima Chukwu leh Mohammed Sanan ten goal khat ve ve an khung bawk a, I League champion Punjab-in a chhanletna tur goal an nei thei lo.

Aizawl FC coach hlui Khalid chuan, "Mi zawng zawng kha an thawkrim em em vek a, kan vaiin chance siam tumin kan bei a ni. Hma takah goal kan khung a, Rehenesh TP-a'n penalty a dan khan kan phur sawt bawk.

"Second half ṭantirah goal kan khung leh a, Jeremy lahin freekick hmangin mawi em emin a khung - engkim mai kha kan tana ṭha turin a thleng a ni," a ti a, a ṭawng uang duh lo.

Punjab hian 1-0 a nih laiin si phurh sut theihna remchang an nei a, mahse, Wilmar Jordan Gil-a penalty hlawhchhuah chu Luka Majcen chuan goal-ah a chantir thei lo a ni.

Mualneitu Punjab tan Daniel Lalhlimpui chu bench aṭanga luhtir a ni a, Jamshedpur tan PC Laldinpuia'n inkhel bul a ṭan thung.