Ronaldo aiin Lewy a ṭha rei zawk ang - Rummenigge

Bayern Munich CEO Karl-Heinz Rummenigge chuan Robert Lewandowski a dah sang hle a, kum upat hnuah Cristiano Ronaldo aiin Poland international hi a ṭhat rei a rin zawk thu a sawi chhuak.

Lewy hi kum 32 mi a ni tawh a, season liamta khan inelna hrang hrangah match 47 khelin goal 55 a khung. Bundesliga, German Cup leh Champions League-ah top scorer ni vekin nomawi pathum a chawi bawk a ni.

Ronaldo-a'n kum 35 a tling tawh a, a la chuai bik lo. Portuguese forward hian season liam ta khan Juventus tan inelna hrang hrangah goal 37 a khung, a vanglai pel tawh mah se player tam zawk chunga leng a la ni chiang viau.

Rummenigge chuan, "Bayern-a ka awm ve chinah chuan Lewandowski hi ka player hmuh tawh zinga puitling, inenkawl ṭha leh invawng ber a ni hial ang. Kum 35 mi an nih ve hunah pawh Cristiano Ronaldo-a kum 35 mi a nih lai aiin a ṭha zawk ang.

"Ei leh inah a fimkhurin a insum thei a, a nunphung hrim hrim hi hriselna lam tur hlirin a khawsa. Football khel turin a taksa hi a serh hrang tlat a, sawi mai aiin a taka hmuh hian a in vawn uluk zia chu a hriat," a ti.

Poland international hi a taksa a enkawl uluk avangin fak a lo hlawh tawh ṭhin. Borussia Dortmund tana a khelh lai pawhin 'The Body' tih chu amah sawi nan an hmang fiam hial ṭhin, a kum tam deuh tawh mah se vanglai a hmang mek.