5 Star Arsenal

Premier League champion tuma inum boruak a nung a, point thum hmuh theih bakah goal khung tam a pawimawh chho dawn niin a lang - Arsenal chuan Inrinni zan khan an mikhualna ramah Burnley 5-0 in an sawp.

Gunners tan hian captain Martin Odegaard-a'n goal khung bul a ṭan a, forward Bukayo Saka-a'n goal hnih a belh bakah Leandro Trossard leh Kai Havertz te chuan goal khat ve ve khung bawkin an chak nuamsa hle.

Mikel Arteta naute hian Krismas vuakvet an zo lo a, an dinhmun a ṭha lo hman hle. Kum 2024 a rawn herchhuah meuh chuan dan theih loh ang maiin an kaltluang - kumina league match vawi nga an khelh tawhah an chak fai vek.

Hliam vangin tun hnaiah Gabriel Jesus an chhawr thei lo, nikum tawp lamah goal khung an harsat avangin sawisel an hlawh. Thlasik bazarah striker an lei leh bawk si loh avangin champion beiseina a tlahniam hman hle.

Mahse, kumina an league match pangaah goal 21 an khung a, anmahni lamah goal hnih chiah a lut! Goal khung harsatna kha player thar lei belh ngawt loin, an neihsa hman thiam dan dapin an chingfel rih niin a lang.

Arsenal hian Chelsea aṭanga an lakluh Havertz chu an hmang ṭangkai thei hle. German international hian goal a khung pup pup lem lo, mahse an khingpui defender-te chhaih buaitu pawimawh a ni a, a ṭhiante tan remchang a sual chhuak ṭhin.

Havertz chuan, "Hun nuam leh hlimawm tak kan tawng mek, kumina kan la chak vek avangin nuam pawh kan titlang hle. Hetianga kan khelh chhuah theih chhan chu a lang lo lama kan thawhrim bakah inlungrualna vang a ni," tiin a sawi.

Hliam vangin defender Oleksandr Zinchenko an la chhawr thei lo, a hmun ruak luahtu Jakub Kiwior a nghet ṭha hle. Ball sem leh a nawr kawngah Zinchenko angin a che na tawk lo a ni mai thei, a hna ber goal ven kawngah erawh a rintlak takzet.

Arsenal manager Mikel Arteta chuan, "Burnley hi hmachhawn an awlsam ngai lo, chutiang team lakah duhthusama kan khel thei kha a lawmawm hle. Ka naute hian match danga chak leh zel an duh, chu chuan min tilawm," a ti.

North London club hian tunah chuan Champions League lam an hawi leh rih a ngai dawn. Nilaini zan hian last 16 first leg khel turin Portuguese club Porto an lenchilh ang.